EleZimbabwe kuthiwa ngelinye lamazwe akuzwekazi leAfrica, aqakathekisa amabhizimusi lemisebenzi yabesifazana.
Kodwa loba kunjalo, lokhe bekhala omama, besithi kunengi okubavimba ukuze amabhizimusi abo athuthuke ngemfanelo.
Ekhuluma eHarare emhlanganweni oqoqwe yinhlanganiso yeWestProp ibambane leyinye njalo inkampani yakweleMelika, eyeAtlatic Council for Freedom for Prosperity, okhokhela inhlelo kunhlanganiso le, uMnu. Joseph Lemoine, uthe kuyajabulisa okwamagama ukuthi omama bayasekelwa kwezamabhizimusi eZimbabwe.
"Kuhle kakhulu ukuthi eleZimbabwe lile mithetho ephakamisa omama abafuna ukungena kwezamabhizimusi. Kodwa kuqakathekile njalo ukuthi lokhu kusekelwe ngumumo omuhle elizweni, ukuze amabhizimusi lawa engatshabalali."
Kodwa loba kunjalo, bayakhala abesifazane abathi zinengi inhlupho ababhekane lazo nsukuzonke eZimbabwe. Omunye wabesifazane laba nguNkosikazi Yvonne Chiwara, olebhizimusi koBulawayo onceda osomabhizimusi ngolwazi lwamabhizimusi.
"Mina ngile bhizimusi elifuna imali enengi kodwa ngingathi ngiswela usekelo. Olunye udubo yikuthi njoba ngingumama, ngikhangelelwa phasi. Uzwa abantu besithi uzama ukuzenz'ubani wena, ukwenza into enje. Lokhu kusibisela emuva njengabomama."
Omunye njalo owesifazane osakhulayo, uNkosazana Nicollette Mbulawa, uthi kabatholi usekelo olwenelayo emphakathini omama abafuna ukungena kwezamabhizimusi.
"Omama yibo abakhangelelwa ukuthibenakekele izimuli. Kubuya kube yinkinga ukuthi benze lokhu, kanye lokuqhuba amabhizimusi. Kabazuzi usekelo olwenelayo."
UNkosazana Primrose Ncube ohlala eKezi eMatobo uyakusekela lokhu esithi omama emaphandleni badonsa nzima kwezokusungula lokuqhuba amabhizimusi.
"Ngapha emakhaya ulwazi luyasilela, okwenza ukuthi loba kulenhlelo zokutholisa omama imali, kabazazi, njalo lokuthi bethole imali, akwenzeki ngoba kufunakala isibambiso. Omama bangapha yikho besalela."
Ekhuluma ngenhlupho ezibhekane labesifazane, umphathintambo obona ngokusetshenziswa kwemali kahulumende, uMnu. Mthuli Ncube, uthe uhulumende weZimbabwe uzakhuphula izinga lokunceda omama abakumabhizimusi.
"Ukuba lebhanga labomama eleWomen's Bank akweneli, yikho sesifuna ukuthi kube lezimali zezikweledi ezingafuliyo ebhanga leli. Sifuna ukuthi nxa beboleka, bengatshaywa likhanda ngoba omama bavele bayathenjwa ukuthi bayabisela izimali abazibolekayo."
Abesifazane abedlula ikhulu abangene umhlangano lo bathole ulwazi lokuqhuba amabhizimusi abalufundiswe yinhlanganiso yeWestProp. Umhlangano lo oqale izolo ugqitshwe namuhla. Ekhuluma kusanda kugqitshwa umhlangano lo, okhokhela inkampani yeWest Prop, uMnu. Keneth Sharp, utshele iStudio 7 ukuthi osomabhizimusi kumele besebenze lohulumende ukuze bethuthukise amabhizimusi abo.
"Isikhathi besesiside uhulumende esebenza engale, osomabhizimusi bengale. Siyayibonga inhlanganiso eyeAtlantic Council, esibonise ukuthi ukusebenza ndawonye kuqakathekile. Siyathembisa njengabosomabhizimusi, ukubambana lohulumende ukuze siphathise omama ngokugcweleyo."
Umhlangano lo uqhutshwe phansi kwesihloko esith: “Women for Prosperity”.
Forum