UMongameli Robert Mugabe usuke elizweni ngoLwesihlanu elubhekise kweleSouth Sudan ukuyaphatheka emkhosini wokunanza ukuthola uzibuse kwalelo lizwe okusemthethweni lixexebuka elizweni leSudan.
Izizalwane zezansi yeSudan zivotele ukwehlukaniswa kwamazwe womabili ngoZibandlela phansi komhlahlandlela weUnited Nations oqede ukulwisana ngo2005 phakathi kwenhla lezansi.
Ukwehlukaniswa kwamacele la kutsho ukubana eleSudan selingamazwe amabili, athi iSudan leSouth Sudan. Lokhu kutsho njalo ukuthi izwekazi leAfrica selilamazwe angamatshumi amahlanu lanhlanu.
Ukwehlukaniswa kwamazwe akusiyonto entsha emhlabeni jikelele, njalo kumbali esanda kwedlula eAfrica, eleEritrea lalo lixexebuke kweleEthiopia lazimela njengelizwe elipheleleyo.
Kodwa esikhathini esinengi lokhu kwenzakala sokuke kwaba lokulwisana okukhulu phakathi kwemihlobo etshiyeneyo inengi lilahlekelwa yimpefumulo.
Kulabakhokheli bakwamanye amazwe abedlula amatshumi amathathu abakhangelelwe ukuphatheka emkhosini wokusungulwa kwelizwe leSouth Sudan.
Inhlanganiso yeMthwakazi Liberation Front, yona ekhankasela ukwehlukaniswa kwesizwe sikaMthwakazi lelizwe leZimbabwe layo inxusiwe emkhosini lo.
Obona ngokwethulwa kwemibiko kulinhlanganiso uMnu David Magagula utshele iStudio 7 ukuthi umzekeliso weSouth Sudan ubanika idlabuzane lokuqhubeka bekhankasela uzibuse wesizwe sikaMthwakazi.
