Umcwaningi wenhlelo zezombusazwe kweleSouth Africa umnumnzana David Maimela, owenhlanganiso ye Mapungubwe Institute for Strategic Reflection, usekhuthaze eleSouth Africa ukuthi lidinge indlela yokuncedisa iZimbabwe ukuze inhlupho ezibhekane lelizwe zingafiki kuhlandla ebezikilo ngo 2008.
Ukulwisana kombango wesikhundla sikamongameli Mugabe okukhona ebandleni leZanu, lokuwa kwezomnotho okwenzakalayo sekutshiye abanengi besesabela ukuthi isimo singacina sifika kwesika 2008.
Ngo 2008 kwaqhamuka udlakela olwesabekayo kwezombusazwe, kwasweleka ukudla ezitolo, uzulu waphila ngengqweqwe zomlomo.
Umcwaningi enhlanganisweni yeMapungubwe Institute for Strategic Reflection kweleSouth Africa UMnu. David Maimela utshele iStudio 7 ukuthi eleSouth Africa kufuze lidinge indlela yokusizana leZimbabwe isimo singakabi sibi kakhulu.
“Akufuneki ukuthi iSouth Africa ilindele iZimbabwe ikakhulu nxa sikhangela ukuthi kulezizalwane zeZimbabwe ezinengi ezibalekela kweleSouth Africa. I South Africa layo ingacela ukuthi ingenelele,” kutsho uMaimela
UMaimela uthi ukuzinza kwesimo eZimbabwe kuletha ukuhlaliseka lakweleSouth Africa.
Kutsho uMaimela: “IZimbabwe uma ingabe isimo somnotho sizosimama sibe kahle, sithuthuke kube namathuba amanengi omsebenzi lokhu kuzonceda ukuthi iSADC yonke ihlaliseke. Ngalokhoke iSouth Africa ngeke izikhiphe kusimo seZimbabwe.”
Lumcwaningi uthi nxa kungaba lenkulumo zokusizana kufuze kuqakathekiswe izifiso zomphakathi.
“Okubalulekile yikuthi abantu beZimbabwe ngaso sonke isikhathi kumele babekwe phambili, izinkinga zabo nenhlupheko yabo kumele kube yiyo esibhekane nayo ngqo, ukwenzela ukuthi yonke le imizamo esiyenzayo ikhone ukuthi ibe lemithelela ekutheni impilo zabantu eZimbabwe ziqhubeke ziye phambili, kutsho umcwaningi.”
Kodwake uMaimela uthi nxa iZimbabwe ingatshengisa ukuthi kayikudingi ukuphathiswa enhlutsheni zezombusazwe lezo mnotho ebhekane lazo, kulutshwana okungenziwa yiSouth Africa njengoba ingalalo ilungelo lokugxamukela ngodli endabeni zeZimbabwe.
“Kuyafuneka ukuthi uma ingenelela iSouth Africa ingenelele ngendlela elokunanzelela okukhulu ukwenzela ukuthi singabuyeli kuleya minyaka eye apartheid lapho iSouth Africa beyizenzela imane ingena yonkindawo izenzela into efuna ukuzenzela yona,” kutsho uMaimela.
Kucatshangelwa ukuthi kulezizalwane zeZimbabwe ezedlula izigidi ezimbili esezikweleSouth Africa ngenxa yenhlupheko eziselizweni. Inengike lesabela ukuthi ukuba kubi kwesimo sezomnotho lezombusazwe kungengeza leli nani kakhulu.
