Iwofisi yakwele Melika ebona ngezemali langempahla etshiyeneyo eyeOffice of Foreign Assets Control ngoMvulo ifakele eyinye inkokheli yebandla leZanu PF njalo yaqinise izijeziso zenotho kunkokheli yebandla leZanu PF egoqela uMongameli Emmerson Mnangagwa lomkakhe, umsekeli wakhe, uMnu. Constantino Chiwenga labanye okuthiwa bephula ilungelo loluntu njalo benza ubukhohlakali.
Ngesikhathi esifanayo, uMongameli Joseph Biden useyekethise izijeziso zenotho eziphansi kohlelo lwezinqumo ezafakelwa abephula ilungelo lolunto lokunye ngomnyaka ka2003 zaqiniswa ngomongameli abatshiyeneyo ngokuya kwesikhathi ngenxa yokuqhubekela phambili bekhahlanyezwa uzulu.
UBiden uthe izijeziso esezesulwe lezi phansi kweziqondiso zomthetho owafakwa owe-Executive Order 13288, kasizelancedo ngakho-ke ukubone kufanele ukuthi zibekwe eceleni.
Kodwa uthe lokhu ekhathazekile ngokwenzakala eZimbabwe okunjengokukhahlanyezwa kukazulu ngeyinye inkokheli yebandla elibusayo labanye lobukhohlakali obumethekisa ngabasebenzelana loMnangagwa.
Iwofisi yeOffice of Assets and Foreign Control ifakele abanye abagoqela uMongameli Emmerson Mnangagwa, uNkosikazi Auxillia Mnangagwa, uChiwenga, uNkosikazi Oppah Muchinguri, uMnu. Kudakwashe Tagwirei lomkakhe uSandra Mpunga abakhokhela inkampani yeTakunda Holdings, umkhokheli wamapholisa uCommissioner General Godwin Matanga, umsekeli womkhokheli wamapholisa ensitha aweCentral Intelligence Organization uWalter Tapfumaneyi, usibalukhulu wesabelo seNkabazwe uMnu. Owen Muda Ncube labanye okuthiwa bephula ilungelo loluntu njalo benza ubukhohlakali. Abanye babevele bephansi kwezijeziso ezafakwa ngele Melika ngomnyaka ka2003.
Okwamanje izijeziso lezi ziphethwe ngokubizwa ngokuthi yiGlobal Magnitsky Program.
Bathi uMnangagwa uphakathi kwakho konke lokhu ngakho-ke bakubone kuqakathekile ukuba ajeziswe labanye bakhe. UMnu. Richard Mahomva obona ngokwethulwa kwemibiko eZimbabwe kuhlangothi lokudlelana lamanye amazwe utshele iStudio 7 ukuba akulunganga okwenziwa ngele Melika.
Ingcwethi kwezombusazwe lezenotho esebenza kukolitshi lezemfundo yaphezulu eNational University of Sciene and Technology, uMnu. Stephenson Dlamini uthe izijeziso zenotho ngezokuzama yokuthi kube lohulumende kazulu Zimbabwe.
Forum