EleMelika seliqhelise izijeziso zenotho elazethesa uhulumende weZimbabwe ngo2003 phezu kokungahlonitshwa kwamalungelo oluntu nguhulumende kaMongameli Mugabe.
Embikweni awethule ngoLwesithathu, uMongameli Barack Obama uthe izijeziso lezi zizaqhubeka zikhona okomnyaka.
Ngakwelinye icele, ubudlelwano beZimbabwe leleBhilithani buqhubeka buncibilika.
EleBhilithani lithi lizathumela umphathintambo walo obona ngezentuthuko eHarare ukuyakhulumisana lohulumende kaMugabe.
Umanyano weEuropean Union wesule izijeziso phezu kweZimbabwe esikhathini esedluleyo lanxa uMugabe lomkakhe belokhu bejezisiwe.
Isiphathamandla seZanu PF uMnu Joseph Tshuma usole inyathelo likahulumende weMelika.
"Kuyasimangalisa lokhu, kanti vele kuyini akufunayo uhulumende weMelika? Basizondelani kanti?" kutsho uTshuma.
Ukuhlaziya loludaba sixhume ingcwethi kwezombusazwe uMnu Nkululeko Sibanda yena othe lanxa ziqhubeka zikhona, izijeziso zeMelika aziphazamisi kakhulu umnotho weZimbabwe.