Uhulumende weMelika uthi kababalekeli eleZimbabwe njengalokhu okukhulunywe nguMongameli Emmerson Mnangagwa otshele umkhokheli wakwele Russia, uMnu. Vladmir Putin, ukuthi ilizwe leli selisekela ngamandla eleZambia lele Malawi ukwenzela ukukhawulisa eleZimbabwe. Abakubandla leZanu PF bathi eleMelika lenza lokhu okukhulunywe nguMnangagwa.
Obephethe isigodlo seMelika eZimbabwe okwesikhatshana uNkosikazi Elaine French uthi ilizwe lakhe kalivumelani lokwethulwe nguMnangagwa esithi okwamanje bazama ngamandla wonke ukunceda abantu abahlaselwe yindlala njalo eminyakeni edluleyo basebenzise amabhiliyoni amahlanu amadollar eMelika – US$5 billion eyokuvuselela ezempilakahle lezinye inhlelo kwele Zimbabwe. Uthi kunengi eleMelika elikwenzela abantu bakwele Zimbabwe.
UMnu. Effort Ncube olwela ilungelo loluntu njalo ohlaziya ezombusazwe ekunhlanganiso yeNational Consumer Rights Association uthi ukhulumele eceleni uMnangagwa ngesikhathi exoxa loPutin kwele Russia ngesikhathi emelele ukungena emhlanganweni wezamabhizimusi oweSt. Petersburg Investment Summit.
"Bekungadingakali ukuthi uMnangagwa akhulume kanjena, uzeyisile zinkulumo zensitha kodwa akukuhle akwenzileyo."
Text- UMnu Swithern Chirowodza owebandla leCitizens Coalition for Change uthi uMnangagwa lokhe ezondele iqula lokhetho eleSouthern African Development Community elalikhokhelwa nguMnu. Nevers Mumba weZambia elathi kaluqhutshwanga ngemfanelo ukhetho olukhulu olwenziwa nyakenye eZimbabwe.
"Inkulumo kaMnangagwa itshekile, lokhe ezondele ukuthi bamtshela mgceke ukuba kaphathanga kuhle ukhetho ngabeSADC bekhokhelwa yiZambia."
Obona ngokwethulwa kwemibiko kubandla leZanu PF, uMnu. Farai Marapira, uthi bakhala ngezijeziso zenotho ezetheswa uMnangagwa labanye bakhe, okuthiwa bephula ilungelo likazulu njalo benza ubukhohlakalo obumangalisayo.
"EleMelika alikhuphe uMongameli Mnangagwa labanye abalitshumi ababethesa izijeziso zomnotho njalo eleZimbabwe alifuni kuphila ngokuphiwa lalo lilizwe elifuna ukuzimela hatshi ukuphila ngokuphiwa."
UMnangagwa watshela uPutin ukuthi eleMelika linika eleZambia lele Malawi uncedo lwezomvikela ukwenzela ukukhawulisa eleZimbabwe elingadlelani lalo kahle. Wathi kungcono uPutin ancede eleZimbabwe ngendlela zonke ngoba eleMelika lifuna ukuxega amazwe la. UMnu. Conelias Mweetwa, obona ngezokwethulwa kwemibiko kwele Zambia, uthi udaba lwenkulumo kaMnangagwa ekwele Russia sebeqalile ukuyiphatha njalo bazalandela indlela zokubuswa kwamazwe ukuqondisisa inkulumo engabaphathiyo njengelizwe.
Forum