lngcwethi yezombusazwe njalo engunobhala wenhlanganiso evikela amalungelo oluntu eye-Freedom Alliance, uMnu Nhlanhla Moses Ncube, uthi inhlanganiso yamazwe omhlaba eye-United Nations kanye lamazwe alamandla kumele zikhuthaze eleIsrael leHamas ukuba bekhumisane umlotha.
UNcube uthi kayisoze iphele impi phakathi kwabalwayo laba ngakho-ke kumele kumiswe impi le ngesiphangiphangi.
Wethule amazwi la kulandela okwethulwe ngumkhokheli wakwele Israel uMnu. Benjamin Netanyahu othi kasoze abeke izikhali empini abayilwa leHamas. Ekhuluma lentathelizindaba, uNetanyahu uthe ukubeka phansi izikhali kuyabe kuyikuvuma ukuthi sebenqotshwe yiHamas.
Inhlanganiso ephathisa abantu eGaza eyeaUnited Nations agency for Palestinian refugees, (UNRWA) yona ithi umumo awusamanga kuhle eGaza, njengoba sekusilela imithi, ukudla, amanzi kanye lamafutha ezimota njalo imigwaqo isigcwele ingcekeza egeleza ivela kuzambuzi. Ezinye izisebenzi zalinhlanganiso ezingamatshumi ayisithupha lane kubikwa sebefele kulimpi kumaviki amathathu edluleyo.
Ukuhlasela kwe-Israeli eGaza kusukzela mhlaka 7 Mfumfu kubikwa sekutshiye abantu abanengi sebelahlekelwe yimizi, ukudla lokunye okudingakalayo kungaseneli. Uhlangothi lwezempilakahle lwabePalestine olukhokhelwa yi-Hamas luthe abantu abedlula inkulungwane eziyisitshiyangalo mbili 8,300 bafele kulimpi, abanengi kubikwa bengabesifazane Labantwana. Ibutho le-Hamas kubikwa labulala abantu abayinkulungwane lengxenye (1 400) abe-Israel okuyikho okwaqala limpi.
Forum