EleIran selihlasela eleIsrael ngamabhomba amanengi awohlobo lwama missiles.
Abezindaba abeVoice of America leReuters babika ukuba ibutho lakwele Israel lithi eleIran liphosele elizweni leli amabhomba afika amakhulu amabili – 200.
Kubikwa ukuba ibutho lakwele Iran eleRevolutionary Guards lithi liphosele amabhomba amanengi kakhulu kulelolizwe njalo lizajezisa eleIsrael lingazama ukuphindisela.
Kukhale ama-alarms elizweni lonke kwele Israel ngesikhathi amabhomba la esemkhathini.
EleIsrael lithi liwalahle phansi amabhomba aphoswe ngeleIran njalo lizaqhubekela phambili lizivikela.
EleMelika lethule umbiko othi uMongameli Joe Biden lomsekeli wakhe uNkosikazi Kamala Harris bebesesigodlweni sikamongameli ngesikhathi eleIran lihlasela eleIsrael.
Belilimukise eleIsrael ukuba lilakho ukuhlaselwa ngeleIran kulandela ukubulawa komkhokheli weHezbollah uHassan Nasrallah, omunye wabakhokhela ibutho kweleIran leyinye inkokheli yeHezbollah eyabhonjwa isesigodlweni sebutho eLebanon ngoLwesihlanu ngeviki ephelileyo.
Isikhulumeli sebutho lakweleIsrael uDaniel Hagari utshele intathelizindaba ukuba akulamuntu olimeleyo kusehlakalo lesi.
EleIran lithi litshelwe ngumkhokheli omkhulu wakulelolizwe uAyatollah Ali Khamenei ukuba lihlasele eleIsrael.
EleIsrael selingenise ibutho ezansi yakwele Lebanon lisithi lifuna ukuxotsha bonke abakubutho leHezbollah emngceleni walo ngoba baphosela amabhomba sonke isikhathi elizweni leli.
IHezbollah ithi izalwisana kabuhlungu lebutho leIsrael eselingene eLebanon.
EleIsrael laqala ukuhlasela iHamas nyakenye ngoMfumfu kulandela ukubulawa kwabantu bakulelolizwe lokuthunjwa kwabanye yiHamas.
Abaphethe ezempilakahle eGaza bathi eleIsrael sebebulele abantu eGaza abedlula inkulungwane ezingamatshumi amane.
EleIsrael lahlaselwa lonyaka ngoMabasa ngeleIran ngamabhomba amanengi elawawisa esemkhathini lincediswa ngeleMelika. EleIsrael laphindisela ngokuhlasela kweleIran loba kwabanganeno.
Forum