UMongameli Donald Trump uzama ngamandla wonke ukuthi kuguqulwe impumela yokhetho ezabelweni eziqakathekileyo okwanqoba uMnu. Joseph Biden webandla lama Democrats kukhetho olwenziwe ngoLwezi.
UTrump wethula imibiko eminengi nsukuzonke enkundleni yokuxhumana eyeTwitter esithi sokumele idale leSenate livimbe ukubalwa kwamavoti awenziwe yiElectoral College aveza ukuba uBiden unqobe ngamavoti edlula amakhulu amathathu – 306. UTrump wathola angamakhulu amabili lamatshumi amathathu lambili – 232.
Kodwa uTrump uthi ukhetho lolu lwebiwa ngama Democrats eGeorgia, Michigan, Pennyslvania leWisconsin. Lezi yizabelo okwanqoba khona uBiden.
UTrump wanqoba ezabelweni lezi ngomnyaka ka2016.
Bamangele abanye abantu abadabuka eZimbabwe abalandela ukhetho lweMelika.
UMnu. Believe Gaule webandla leZanu PF uthi okwenziwa nguTrump kulakho ukwenzakala kwamanye amazwe.
UMnu. Paul Ndlovu odabuka eFilabusi esabelweni seMatabeleland South uthi kumele uTrump avume ukuba unqotshwe nguBiden.
UBhanda Moyo oweMadabe eNdolwane esigabeni Bulilima West uthi uTrump sokumele aphume esikhundleni.
Abalandeli baka Trump abanengi bacabangela ukuthi ukhetho lwebiwa libandla lama Democrats. Akulabufakazi obethulwe emadale emthethwandaba obuveza ukuba ukhetho kalwenziwanga ngemfanelo.
