Uqhubekela phambili umkhankaso wokhetho lulamongameli oluzakwenziwa ngomnyaka ka2020.
Abancintisa kukhetho lolu abagoqela uMnu. Ben Sanders, okubandla lama Democrats, labanye bakhe abambalwa bahlasela uMongameli Donald Trump besithi usebhidlize isimo seMelika.
USanders uthi kugcwele inzondo kwele Melika.
“Kumele sehlukane lenzondo lakho konke okukhulunywa ngabantu abanjengo Trump. Kumele sibelilizwe elilabantu abahloniphekayo.”
Kodwa uMnu. Donald Trump uthi abantu abalenzondo ngabalandeli bebandla lama Democrats.
“Sonke isikhathi ama Democrats atshengisela ukuthi sebephambene ingqondo. Akungimangalisi lokhu.”
UMnu. Joe Biden, owayengumsekeli kaMongameli Barack Obama njalo oncintisa kukhetho lolu, uthi uTrump nguye ophambanisa ilizwe.
“Okusenza sibelilizwe elihloniphekayo yikuhlonipha abanye abantu lokulandela ubuntu bethu.”
Uthi ulwisana lezenzo zikaTrump. “Angihlaseli uTrump ngokwakhe ngikhuluma ngezenzo zakhe. Akusimlandu wami ukuthi ngikhulume ngaye.”
Omunye okubandla lama Democrats, uNkosikazi Kamala Harris, uthi banengwa yizenzo zika Trump.
“Kasizake sime ukulwa yikho silapha namuhla. Siyakwazi ukuthi ilizwe lethu liyabhidlika. Silapha ngoba umbuso wethu owe-democracy usugugudekile. Lokhu kasikaze sikubone. Kumele sibezazi ukuthi singabobani.
“Kumele sibikele abantu ukuthi singobani. Bantu beMelika singcono kulalokhu. Akusilo lizwe leMelika lapho okuthukwa khona abethula imibiko lezindaba.”
Sebesedlula amatshumi amabili abancintisa kukhetho lukamongameli abakubandla lama Democrats.
