EleBotswana liqhube ukhetho lokudinga uhulumende omutsha namuhla, uMongameli Mokgweetsi Masisi esithi abantu abanengi bamvotela okuzakwenza angene kusigaba sakhe sesibili sokubusa – isecond term.
UMasisi uvote esiqintini seMoshupa okungamakhilomitha angamatshumi ayisithupha usuka esigodlweni eGaborone. Eqeda ukuvota, uMasisi uthe uleqiniso lokuthi ibandla lakhe leBotswana Democratic Party (iBDP) lizanqoba, kungasoke kubelesidingo sokubumba uhulumende womanyano.
"Kanti likuthatha ngaphi ukuthi kungaba lohulumende womnyano. Sizakudla abantu. Ye, kungabakhona ukuthi kube lohulumende womanyano ngomthetho. Kodwa angiboni lokhu kusenzakala."
Ukhetho lweBotswana luqhutshwa ngesikhathi isimo somnotho singamanga kuhle kubangwa yikungathengwa kwamatshe aligugu enjiwayo, ama-dayimani. Umnotho welizwe leBotswana ugxile kakhulu kumadayimani.
Abamabandla aphikisayo bachotoza eleBDP besithi liyehlulekile ukuphatha kahle umnotho. IBDP isibuse phose iminyaka engamatshumi ayisithupha (58). UMasisi uthi bayavuma ukuthi kumbalwa okumele kulungiswe kwezomnotho.
"Njenge bandla siyavuma ukuthi kulemigoqo egoqela ukuswelakala kwemisebenzi kanye lokugxila kakhulu komnotho kumadayimani. Okunye ngezemvelo okunjengokuguquka komkhathi. Kodwa siyenza konke okusemandleni ukukulungisa."
Umkhokheli womanyano wamabandla aphikisayo, ele Umbrella for Democratic Change, uMnunzana Duma Boko, yena uthi sesitshayile isikhathi seBDP. Ibandla leli lithi iBDP kaMasisi lisebenzisana leleZANU ukuqilibezela kukhetho lolu, kodwa amabandla womabili ayakuphika lokhu.
"Abantu sebezwile imilayezo yethu sekukibo ukuthi bekhiphe ibandla elibusayo embusweni."
Kusenjalo, imbono yabeZimbabwe kweleBotswana idabuke phakathi ukuthi kambe ukhetho lolu lungabe lusitshoni kibo, ikakhulu kukhangelwe ikusasa yabo. UMnunzana Cephas Tshuma, okhokhela inhlanganiso yabeZimbabwe kweleBotswana, uthi vele uma kulokhetho ungumuntu wokuza, kuba lokungahlaliseki.
“Ukungahlaliseki kuba khona ngoba vele uyabe ungakwazi ukuthi kuyangena liphi ibandla. Njalo ungakhangela wena njengo muntu wokuza uyabe usazi ibandla elibusayo ungazi ukuthi ukuntshintsha kungakulethela ni.”
Kodwa uMnunzana Nick Hurekure owabumba inhlanganiso eyezizalwane zeZimbabwe kweleBotswana, uthi kaboni ukhetho lungaphazamisa inhlalakahle yabeZimbabwe.
“Angibone kungadala ukungahlaliseki ngoba kade sabona ukhetho lubuya ludlula kweleBotswana kungabangela ukuthi kube lontshintsho kakhulu kumthetho ephathelene labokuza.”
Kulabanye ababeyizizalwane zeZimbabwe kodwa asebathatha incwadi zokuba ngabe Botswana, eye citizenship, abavote lamuhla kukhetho. Omunye wabo nguMnunzana Kwanele Mhlophe ovetele eMoshupa lapho okuvela khona uMasisi. UMhlophe owake wavota eZimbabwe uthi kunengi eleZimbabwe elingakufunda kweleBotswana.
"Ngapha kwehlukile. Ukhetho lwakhona lukhululekile. EleZimbabwe lingafunda ukuthi kuyenziwe yonke into mgceke njalo kuvunyelwe ukuthi umuntu akhethe engencindezelwa.”
Indawo zokuvotela zivalwe ngehola lesikhombisa. Impumela yokhetho lolu ikhangelelwe ukuqala ukubikwa kusukela lamuhla ebusuku kusiya ngoLwesine ekuseni.
Forum