Amalunga edale lephalamende kweleBotswana athi akhathazekile kakhulu ngokwanda kwabokuza abavalelwe entolongweni zakulelolizwe abagoqela abeZimbabwe abayibo abalenani eliphezulu.
Ilunga lekhomithi yephalamende eyePublic Accounts Committee uMnu Pono Moatlhodi ukhokhele ingxoxo phezu kokukhathezeka kwabo ngodaba lolu, lona athi kumele lulungisiswe.
Ekhuluma ngoMvulo ngesikhathi ikhomithi le isamukela umbiko ngesimo samajele akweleBotswana, uMoatlhodi uthe kuyadanisa kakhulu ukuthi kulezibotshwa zakwamanye amazwe ezedlula amakhulu amahlanu, 524, ezipikayo kulelolizwe.
Ngomnyaka ka2019, bekulabeZimbabwe abedlula amakhulu amahlanu, 502, abakade besezintolongweni njalo bebotshelwe amacala atshiyeneyo eBotswana. Inani lamabhantinti wonke agoqela ayizizalwane zalelolizwe liphose lifike kunkulungwane ezine, 3,882.
Ukuze kuphungulwe inani leli, uMoatlhodi uthi kufanele kube lemizamo yokubuyisela emuva abokuza ukuze bayepika besemazweni abo.
“Abokuza banengi kakhulu, bengibuza ukuthi kanti akulandlela abangabuyiselwa emazweni abo ngoba balakho ukuphazamisa abantwabethu. Uma kusenzeka amazwe abo kathathe abawonayo laba, bayekibo,” kutsho uMoatlhodi.
Usikomitshi wamajele, uNkosikazi Dinah Marathe, uthi lokho akumelanga kube luhlupho olukhulu ngoba kulemithetho eyalotshelwana phakathi kweleBotswana lamanye amazwe akumanyano weSadc, phezu kokubuyisela emuva kwabokuza abasemajele aseBotswana.
EleZimbabwe laba ngelinye lamazwe akuqala ukungena kusivumelwano lesi, kodwa imthetho yakhona ayikalotshwa ukuze iqale ukusebenza.
“Selizivumelwano esesizilobe lamanye amazwe ikakhulu aseSADC, phezu kokubuyisela abokuza abasemajele, kodwa lokhe sisakhangela ukuthi imithetho esemazweni atshiyeneyo, iyahambelana,” kuchasise uMarathe.
Liya lisanda inani lezizalwane zakwamanye amazwe ikakhulu ezivela eZimbabwe, ezidala amacala atshiyeneyo.
Abanye abeZimbabwe kweleBotswana abafana loMnu Nkazimulo Nkala bathi amanani ezibotshwa zakwamanye amazwe lezi onela ezinye izimvu.
Uthe uNkala: “Yebo kulokukhathazeka ukuthi abanye bethu bafika benze into ezingalunganga. Kodwa kuqakathekile ukuthi singapendi wonke umuntu ngokufanayo. Ngodaba lokubabuyisela ukuthi bayepika emajele asekhaya, kuqondile, kodwa angiboni kungaqeda udubo lokudalwa kwamacala.”
Abantu abangelamaphepha babikwa beyibo abahamba phambili ngokudala amacala bedinga indlela zokuziphilisa.
Kusenjalo, usikomitshi wamajele, uMarathe uveze izolo ukuthi abasemajele sebezavunyelwa uxoxisana lezihlobo zabo kusetshenziswa umabonakude we-video conferencing.
EleBotswana lamisa ukuvakatshela emajele nyakenye ngendlela yokwenqabela ukumemetheka komkhuhlane weCOVID-19.
