EleZimbabwe lisebenzelana lenhlanganiso yeAfrican Union limanyene lamanye amazwe womhlaba ekunanzeni ilanga lokulwisana lokumemetheka kokuthelelanwa kwegcikwane lengculaza emhlabeni jikelele, eleWorld AIDS Day.
Kube lombuthano omkhulu eVictoria Falls ongenwe ngumphathintambo wezempilakahle uMnu. David Parirenyatwa lezinye iziphathamandla zikahulumende, abamele iAfrican Union, abamele inhlanganiso ezizimele zodwa labamele ohulumende bamazwe agoqela iSwaziland, Tanzania, Zambia lamanye awezwekazi leAfrica.
Umhlangano lo olandela omunye owenziwe ngeSonto okade ukhangelane lokudinga imali yokulwisana lokumemetheka kwegcikwane leHIV lomkhuhlane weAIDS, wenziwe ngaphansi kwesihlolo esithi ‘Getting to Zero in Africa: Africa’s Responsibility, Everyone’s Reponsibility’.
UDokotela Mustapha Sidiki Kaloko, umqondisi wekhomishini ebona ngezenhlalakahle kazulu eye African Union Commission utshele iStudio 7 ukuthi isihloko lesi sihlose ukukhuthaza umuntu wonke ukuthi alwisane lomkhuhlane lo ukwenzela ukuthi unqotshwe kungakafiki umnyaka ka2030.
UDokotela Kaloko ungcome kakhulu uhlelo oluqhutshwa yiZimbabwe olweAIDS levy.
Uthi loluhlelo solubuthanisele ilizwe izigidi ezedlula ikhulu lamatshumi amahlanu amadollar - $150million emnyakeni eyisikhombisa edluleyo.
UDokotela Kaloko uphinde wathi imali yomthelo weAIDS Levy isetshenziswa ngendlela ezikhaliphileyo eZimbabwe njengoba enengi yakhona ingeyokwenqabela ukumemetheka kwegcikwane leHIV.
Omunye walabo akade besemhlanganweni lo nguMnu. Sipho Mahlangu, olwela ilungelo labaphila legcikwane leHIV, otshele uGibbs Dube weStudio 7 ukuthi kuyajabulisa ukuthi amazwe amanyene lamuhla ukulwisana legcikwane leli lomkhuhlane weAIDS.
Kusenjalo, abamele amakhansili emhlabeni wonke jikelele lamuhla bayenze umhlangano omkhulu edolobheni leParis, France, lapho abalobelane khona isivumelano se 2014 Paris Declaration.
Isivumelwano lesi ngesokuthi kumele abantu abanengi babekwazi isimo sabo segcikwane leHIV, kuthi labo abasaziyo isimo sabo sokuphila legcikwane bathole amaphilisi ama ARV njalo labo abelatshwayo bengagcizeleli umkhuhlane lo ngendlela ezitshiyeneyo kusiyafika umnyaka ka2030.