Ukhetho lwebandla leZanu PF lokukhetha labo abazamela lelibandla kukhetho lwelizwe lube yingxabangxoza amanye amalunga ebandla leZanu PF ebelesifiso sokungena kukhetho bathole amabizo abo engekho emaphepheni okuvota, amaballot papers kuthi kwezinye indawo lolukhetho luphuzile ukuqala.
Amalunga ebandla leZanu PF abalisa uMnu Rido Mpofu obefuna ukuncintisa kukhetho lweSenate eGwanda Kanye loMnu Lungisani Ncube obefuna ukuncintisa kukhetho lwaameli bedale lephalamende eGwanda North amangele lapho ethola ukuthi amabizo about kawakho emaphepheni okuvotel amaballot papers okudale ukukhonona kwabo Kanye labalandeli babo.
Loba nje lolukhetho bekumele luqale ekuseni ngehola lesikhombisa kuze kwatshaya ihola letshumi kulokixokozela emahofisini ebandla leZanu PF eGwanda lapho amapholisa ebegcwele khona elindele ukuyancedisa ekuvoteni.
EJahunda Hall kuze kwaba semini Abalandeli bebandla leZanu PF belokhu belinde ukuvota kodwa kungela maphepha okuvotisa.
UMnumzana Rido Mpofu ubikele lumsakazo ukuthi kasangenanga kukhetho ngoba ibizo lakhe lingekho njalo uthi uzamelela ukuzwa ngeziphathamandla imbangela yokweqiwa kwebizo lakhe.
Emaphandleni abalisa iGwanda South le North ukuvota kuphuzile ukuqalisa kodwa obekusobala yikuthi abancintisayo bebethwala Abalandeli babo besiyalapho obekuvotelwa khona.
Ukhetho lwamaPrimary aweZanu PF eZansi yemaNdebeleni lungene ngamalunga amanengi kakhulu njalo utshalimani walelibandla kulumhlubulo uthi uzulu uhugwe ngumbuso omutsha kaMongameli Emmerson Mnangagwa.
Ibandla leZanu PF belithe ukuvota kuzavalwa lamhlanje ntambama kodwa ngenxa yingxabangxoza ebekhona lulakho ukuqhubeka kwezinye indawo kuze kube sebusuku.
Impumela yalolukhetho ikhangelelwe lamhlanje ebusuku.
