Izisebenzi zithi ziyayithakazelela imizamo kahulumende eyokwehlisa inani labantu abagunyulwa imisebenzi elizweni ngokuthi amankampani abaqhatshayo aqale atshengise izizatho eziqinileyo engakakwenzi lokhu.
Uhulumende uthi amankampani la kufanele aqale tshengise ukuthi azama yini eminye imizamo efana lokwehlisa umholo ophezulu oweziphathamandla zawo njalo achasise lokukuthi ukukhupha abantu emsebenzini kuzaqinisa njani amankampani la.
Ukuhlaziya loludaba, sixoxe loMnu. Bulisani Ncube, ingcwethi ecubungula ezomnotho welizwe njalo engusomabhizimusi, endawonye loMnu. Ambrose Sibindi, isiphathamandla senhlanganiso elwela amalungelo ezisebenzi, eye Zimbabwe Congress of Trade Unions.
UMnu. Sibindi uyalisekela inyathelo likahulumende kodwa uMnu. Ncube uyalisola esithi umnotho welizwe yiwo okufanele uguquke njalo akukho emthethweni ukwehlisela abanye iholo.
