Abamabandla ezokholo lweSiKhristu atshiyeneyo koBulawayo athe gwaqa emzini kamuyi uDumuso Dabengwa ngoLwesine aphathe khona umthandazo wokududuza izihlobo labangane bakamuyi.
Amabandla ezokholo abecula ethandaza ehlanganela lemuli yakoDabengwa emzini kamuyi kanye lokubonga uSomandla ngesikhathi umuyi esemhlabeni lapho asebenza gadalala ukulwela inkululeko yesizwe.
Inkokheli zamabandla la zincome kakhulu umsebenzi owenziwa ngumuyi isithi akulahlekelwanga umdeni kamuyi kodwa ilizwe lonke.
Lokhu kufakazwe ngeyinye yale nkokheli uMnu. Baster Magwizi othe, “Lamhlanje sihlangane lapha emzini wakoBaba uDabengwa ositshiyileyo ekupheleni kweviki yonale edlulileyo. Kusuku
lwanamhlanje kuhlangana abafundisi abathe bazanikeza umhlangano omkhulu, ngoba abafundisi ngabantu bakaNkulunkulu abaze ukuzesiduduza enhlungwini esilazo
ngokulahlekelwa liqhawe lelizwe uSupremo uGeneral Dabengwa”
UReverend Kenneth Mutata, unobhala wenhlanganiso yeZimbabwe Council of Churches, uthe kungaba yikuphambanisa ukuthi umuntu athi uDabengwa wayengowasigaba esithile.
“Sizalapha njengamabandla ukuthi siduduzane, okwesibili ukuthi sincoma impilo enkulu kakhulu. Ubaba uDabengwa wayeyindoda emadodeni, akwenzi ukuthi umuntu athi angakhuluma ngaye njengomuntu owendawo eyodwa, kodwa ngumuntu owayesaziwa
umhlaba wonke … Sithi yiwuphi umsebenzi ayewufuna kakhulu, wayefuna ukuthi
ilizwe lipkhululeke okugcweleyo.”
UMfundisi Andria Sibindi, owebandla leBrethren in Christ Church, ufakaze ngokuzinikela kuka Dabengwa ukusebenzela umphakathi.
“Size lapha njengamabandla ukuzoduduza imuli yako baba uDabengwa esikutshoyo lesikuphakamisayo sithi sikhala kanye labo njalo futhi ababekwazi ukuthi sonke lapha ubaba afike khona ukudlula emhlabeni sonke sizafika ngitsho futhi lakumuli lakucommunity yako Bulawayo yaselizweni lonke ukuthi lapha ubaba uDabengwa afike khona sonke sizafika khona as long uJesu engaka fiki okumqoka okuqakathekileyo lokuqakathekileyo sizilungiselele ubudlelwano loNkulunkulu.”
UMfundisi Sinjoki, owebandla lePraise and Worship Center, ufakaza ngezifiso zikamuyi njengoba babevame ukuxoxa njengabomakhelwane.
UMnu. Charles Nyathi, umqondisi wohlelo lomngcwabo, uthi ngoLwesihlanu abantu bazabuthana eWhite City bevalelisa iqhawe lamaqhawe.