Kuviki ephelileyo ngoLwesihlanu, uMnumzana Donald Trump ufungiswe ukuthatha isikhundla sokuba ngumongameli wele Melika omutsha.
Lesi sehlakalo sitshiye abantu abanengi emazweni atshiyeneyo womhlaba belembono eyehlukeneyo, abanye besithi akanikwe ithuba kubonwe ukuba uzosebenza njani kodwa kulabanye abathi ababoni ukuthi uzoletha inguquko engathuthukisa impilo yabo.
Abesifazane baseMelika bemanyene labasemazweni atshiyeneyo womhlaba kabazange bamelela ukuthi aqale umsebenzi bahle babonisa umhlaba ukuthi kabajabuliswa yikuthatha kukaMongameli Trump isikhundla lesi ngokugcwala emigwaqweni betshengisela emadolobheni agoqela esigodlweni eWashington DC, esigodlweni seBhilithani iLondon, lamanye amanengi, besihi, uMongameli Trump ulobandlululo.
UMnumzana Shaun Matsheza, ingcwethi kwezokwethulwa kwezindaba, uthe kaboni uTrump esenza konke akuthembisa ngesikhathi ekhankasela ukuba ngumongameli nyakenye.
Omunye obelandela kabanzi umkhankaso wokudinga umongameli weMelika kusiyafika ekuqhutshweni kokhetho ngoLwezi nyakenye lapho Mongameli Trump anqobe khona, uMnumzana Joseph Tshuma, ummeli wePelandaba-Mpopoma edale lephalamende ekubandla le ZANU PF, uthe umongameli omutsha sokuzamele ahloniphe abokuza lezinye izigaba zabantu empilweni.
Edabeni lokutshengisela ezitaladini kukhononwa ngezenzo zika Trump, uNkosikazi Sekai Holland, ingcwethi ecubungula ezombusazwe, uthe kuyanceda ukuba abantu bebambisane emkhosini lo ukwenzela ukuthi kulungiswe abakusolayo.
Esephatha udaba lwezijezo zomnotho ezafakelwa uhulumende wase Zimbabwe nguhulumende wele Melika, uMnumzana Sam Sipepa Nkomo, owebandla le Zimbabwe People First elikhokhelwa nguNkosikazi Joice Mujuru, uthe akakholwa ukuthi uMongameli Trump uzozakhipha.
Bekulilanga lakhe lakuqala ngoMvulo uTrump lokuqalisa umsebenzi wakhe.
