UMongameli Donald Trump uthi ilizwe leMelika lilakho ukubhidliza ilizwe leNorth Korea nxa kungafika isikhathi sokuthi lizivikele.
Uthi akhona njalo amazwe asekela okuhambelana lokwenziwa yiNorth Korea okwenza ukuthi abantu bahlupheka okumangalisayo.
UTrump utshele abasemhlanganweni weUnited General Assembly ngoLwesibili ukuthi kumele amazwe wonke alwisane lalawo afuna ukuthwalisa nzima amanye anjenge North Korea, Venezuela leIran.
Uthe iMelika lamanye amazwe angeke agoqa izandla abukela okwenziwa yiNorth Korea elolonga izikhali ze-nuclear.
“INorth Korea idelela amanye amazwe okumangalisayo. Phakathi kwamazwe wonke emhlabeni jikelele akulalizwe eledlula eleNorth Korea elithwalise nzima abantu. Abantu kabatholi kudla njalo abanye bayabulawa kuthi abanye njalo bayavalelwa entilongweni kungelasizatho.”
UTrump uthe ilizwe leMelika lizimisele ukubhidliza eleNorth Korea eliqhubekela phambili lisenza izikhali ze-nuclear.
“Ilizwe leMelika lilamandla amangalisayo njalo lithobekile. Kodwa nxa kufunakala lilakho ukubhidliza ilizwe leNorth Korea lingabona ukuthi lilakho ukuthwaliswa nzima. URocket Man (Kim Jong Un) ufuna ukuzibulala labanye abusa labo.”
Uphinde wathi ilizwe leIran lalo lenza okungavunyelwayo ngoba linika izikhali amazwe alwisana leMelika.
“Sesidlulile njalo isikhathi sokuthi kulwisane lelinye ilizwe elenza okungalunganga. Ilizwe leli likhuluma ngokubulala abantu beMelika, abe Israel labanye. Ilizwe leli lenza konke lokhu engani likwenzela uzulu lona likhuthaza ukukhahlanyezwa kukazulu.”
UTrump uthe akuvunyelwa okwenziwa ngamazwe anjenge Venezuela, ele Syria lamanye akhahlameza uzulu. Ukhale ngokuthi kumele lenhlanganiso yeUnited Nations ilwele ilungelo loluntu lokunye okufunakalayo njengalokho eyabunjelwa khona.
Uncome okunye okwenziwa ngamanye amazwe kuzwekazi leAfrica lobanje echothoze impi yomvukela kwele South Sudan lamanye amazwe.
“Inhlanganiso yeUnited Nations ibambisana lenhlanganiso ye African Union zabambisana ukunqabela impi emazweni kwamanye amazwe. IUnited Nations isebenza kakhulu ekuzameni ukunqabela indlala kwele South Sudan, Northern Nigeria le Yemen. Ilizwe le Melika lifaka imali enengi kakhulu ekuzameni ukuphandela abanye abantu emhlabeni wonke jikelele.”
Abanye abantu abalalele okwethulwe nguTrump abanjengoMnu. Thabang Nare, isizalwane zeZimbabwe esihlala eMelika, bathe uzamile ukukhuluma njengomuntu olwela abanye abantu, ikakhulu abeMelika.
Uthe okudadinsayo yikuthi kakhulumanga okunengi ngezwekazi leAfrica.
Omunye njalo olalele okwethulwe nguTrump nguNkosikazi Thalenta Ncube, isizalwane seZimbabwe esihlala eDallas, Texas.
UMaNcube uthe bekungazwakali okunye okwethulwe nguTrump.
Ugcizelele esithi akumangalisi ukuthi uTrump kethulanga imbiko eqakathekileyo ngele Zimbabwe lamanye amazwe kuzwekazi leAfrica.
Inkokheli yamazwe atshiyeneyo ithe gwaqa eNew York lapho eyethula khona imibiko ngokwenzakala emhlabeni wonke jikelele.
UMongameli Robert Mugabe usemhlanganweni lo.