Ingcwethi kwezempilakahle bathi kuqakathekile ukulandela iziqondiso zokuzivikela ekubambeni igciwane leCOVID-19 loba abantu bebhekane lomnotho ogugudeka okumangalisayo ngesikhathi umemetheka kakhulu umkhuhlane weCoronavirus.
Uphenyo olusanda kwenziwa yinhlanganiso elwela amalungelo kazulu eyeZimbabwe Association of Human Rights luveza ukuba abantu bayehluleka ukulandela iziqondiso zokuzivikela kumkhuhlane weCOVID-19 ngenxa yesimo esibi somnotho welizwe.
USikhwicamfundo Solwayo Ngwenya, umphathi wesibhedlela seMpilo Hospital, ukhuthaza abantu ukuthi balandele iziqondiso zokuzivikela kumkhuhlane weCOVID-19.
“Abantu sibaxwayisa ukuba umkhuhlane wecorona usubhahile lapha ekhaya abantu sebengenelwe ezindlini abanye bayafa bengayanga esibhedlela. Abantu bayaxwayiswa ukuthi bengasondelelani eduze bephefumulelana. Kumele bagqoke imask evala umlomo lamakhala kodwa uthola abantu bevale umlomo amakhala ephandle. Lokhu kuyingozi. Siyaxwayisa kakhulu bantu bakithi umkhuhlane ubhahile uma lingalaleli lokhu esilitshela khona.”
UDokotela Mildred Mnkandla, ingcwethi kwezempilakahle, uvumelane loSikhwicamfundo Ngwenya esithi abantu abagqoki kahle okokuzivikela.
“Amamask abantu bawagqoka ingathi babalekela amapholisa kanti-ke yikuthi kumele sivikele ukuthelelana umkhuhlane. Impilo ngezethu hatshi bo ukutshiya umlomo lamakhala phandle …”
Isakhamuzi sakoBulawayo, uNkosikazi Agnes Dumani, uthi abantu abagqoki kahle ama masks asesaziwa ngabanye ngokuthi yizayeke.
“Amamask ayangikhathaza. Abagqoki ngendlela efaneleyo bayesaba amapholisa kulomkhuhlane. Kumele bazivikele ngokuvala amakhala lomlomo.”
UNkosikazi Anna Ndlovu laye uthi kuqakathekile ukugqoka ama masks sonke isikhathi.
“Amamask aqakathekile ngaphandle kwawo isizwe singatshabalala. Siyajabula uma uhulumende esithi silandele iziqondiso zokufaka amamask umuntu wonke alandele, avale umlomo lamakhala ngoba kuthiwa isifo sesingenile. Kuqakathekile ukuba isizwe sisinde.”
Isakhamuzi sakoBulawayo, uNkosikazi Nokuthula Ndlovu, ulombono ofanayo.
“Kuqakathekile ukuba abantu bagqoke imask ngales’ikhathi avikela okunengi ikakhulu ngesikhathi lesi. Abantu abalandele okukhulunywayo. Abantu abagqoke amamask.
Kusenjalo, uNkosikazi Adelaide Eleanor Shearly ngoLwesine unike abahlala emzini wobasebekhulile weEkuphumuleni Geriatric Nursing Home izembatho zekhanda ezedlula amatshumi amahlanu.
UNkosikazi Eleanor Shearly uthe lokhu kwenzelwe ukuba ogogo labokhulu bakhudumale ngesikhathi somqando lonyaka.
Umongikazi weEkuphumuleni Geriatric Nursing Home, uNkosikazi Prisca Joubert, ubonge isipho lesi.
“Siyabonga impahla esisiphiweyo ezabogogo labokhulu ngesikhathi somqando leCovid-19 ukuba bagqoke bakhudumale. Siyabonga kakhulu.”
