Ingcwethi kwezempilakahle zithi ukudla yikho okuyisiqokoqela kwezokwenqabela ukuhlaselwa yizifo ezingathelelanwayo okubalisa imvukuzane, iHigh Blood Preasure, esetshukela, idiabetes lezinye ezinenginengi.
Ingcwethi zempilakahle zikhuthaza uzulu ukuba abuyele ekudleni ukudla okwakudliwa ngabokhokho endulo khona osekwabonakala ukuba kusiza kakhulu ekuthini umuntu azivikele ekuhlaselweni yilezi zifo.
Abezempilakahle bathi ukudla kwendulo sekukhangangelelwa phansi kuthiwa ngokwabayanga okwenza inengi liphile ngokudla kwalezinsuku, okunengi kwakho kungokucholeke kakhulu njalo kuphela ngendlela engalungelanga umzimba.
Omunye walezingcwethi nguDokotela John Mangwiro yena ogxile kakhulu kwezokusebenzelana labalesifo setshukela elizweni ekhokhela inhlanganiso ye Zimbabwe Diabetes Association (ZDA).
UDr Mangwiro uthi inhlolisiso eyenziwayo iyakuveza ukuba ukudla kwalenzinsuku kuphathisa ekuvikeleni limikhuhlane lanxa uzulu esengowathatheka ngokudla kwalezinsuku, etshiya okwakuvele kudliwa ngokhokho, kubavikela kumikhuhlane njalo bekhula baze bakhokhobe osekuyimvelakanci kulezi nsuku.
Ugogo Priscilla Muzenda ohlala edolobheni le Chivhu useleminyaka engamatshumi ayisithupha lanye yokuzalwa (61) engelaso leso sifo setshukela njengabanye abalingana laye.
Unkosikazi Muzenda uvumelana lokutshiwo zingcwethi njalo usola ukudla kwalezinsuku.
Ugogo Muzenda uthi luyasilela ulwazi kwezokudla lapho ahlala khona e Chivhu osekubangele ukuqansa kwabatholakala belalezi zifo ezingathelelanwayo.
Inengi labakhulumisane lalumsakazo ngesikhathi kungenwa umhlangano labe ZDA khona eChivhu okubalisa ugogo Anna Simbi, batshengise ukumangala lapho betshelwa ngezokuqakatheka kokudla kwesintu.
UMnu. Henrick Mzenzi Mukhethiwa oleminyaka engamatshumi ayisithupha lantathu ngomunye wabathi ubengelalo ulwazi kwezokudla njengalokho osekutshiwo zingcwethi.
UMukhethiwa uthi useyizwisisa ingozi ebangelwa yikudla kwakulezinsuku okuthiwa ngokwesikhiwa njalo uthi usezokudla okwendulo okuyikho okusiza umzimba wakhe.
Ingcwethi kwezempilakahle zithi liyaqhubeka liqansa inani labahlaselwa yimikhuhlane engathelelanwayo, okunengi kwakhona bethi kungokubangelwa yikudla kwalezinsuku, sewaphambuka kulokho okwakudliwa endulo.
Kunhlolisiso eyenziwa ngabe World Health Organisation ngomnyaka ka 2014, kwavela ukuba abantu abayisilinganiso esingamatshumi amathathu lanye sabalahlakelwa yimiphefumulo kubangelwa yimikhuhlane engathelelanwayo.
