UMongameli Cyril Ramaphosa uthi akumelanga izizalwane zakwele South Africa zihlasele abantu bokuza.
Wethule amazwi la enkundleni yokuxhumana eyeTwitter ngesikhathi amapholisa leziphathamandla zikahulumende belemibono etshiyeneyo ngokufa kwabantu bokuza.
URamaphosa uthi uzahlala phansi labaphathintambo bezomvikela ukwenzela ukuthi kumiswe udlakela lolu olutshiye abantu abahlanu befile, abanengi belimela njalo kwatshontshwa ezitolo zabantu bokuza.
Bekulodlakela njalo namuhla endaweni ezinjenge Alexandra, eThokoza lezinye lapho okutshiswe izitolo zabantu bokuza.
Umphathintambo wamapholisa, uMnu. Bheki Cele, utshele inkampani yezindaba eyeENCA ukuthi kulabantu abahlanu asebefike kudlame lolu.
Kodwa-ke isikhulumi samapholisa, uVishoo Naidoo, uthi akulamuntu osefile kudlame lolu.
Omele ilizwe leZimbabwe kwele South Africa, uMnu. David Hamadziripi, uthi akwaziwa ukuthi kulabantu abangaki abadabuka kwele Zimbabwe asebebulewe kwele South Africa selokhu kuqhamuke udlame lolu.
UMnu. Khulekani Sibanda, odabuka kwele Zimbabwe ohlala eJohannesburg, uthi benengi abantu asebedlela evalweni ngenxa yodlame lolu.
UMnu. Volta Moyo, odabuka kwele Zimbabwe ohlala esabelweni seLimpopo, uthi kuthule endaweni leyo.
