Idale lomthethwandaba eleHigh Court ngoLwesithathu lithethe isinqumo sokuthi uhulumende wenza iphutha ngokuvimba ukutshengisela ezitaladini eHarare.
Umahluli wedale leli, uJustice Priscilla Chigumba, uthe UMugabe wenza okungekho emthethweni ngokuthatha inyathelo leli ngeviki ephelileyo ngesikhathi amabandla aphikisa ibandla leZanu PF akunhlanganiso yeNational Electoral Reform Agenda efuna ukutshengisela ezitaladini.
UChigumba wenze isinqumo lesi lobanje omahluli labomantshi besanda kuthethiswa nguMongameli Robert Mugabe owatshela abasakhulayo kubandla lakhe ngempelaviki ukuthi bavumela uzulu ukuthi atshengisele.
Abantu makhaza kade betshengisela phose nsukuzonke bekhonona ngesimo esibi somnotho welizwe leZimbabwe lokuthi uMugabe ubusa ngendlela ebancindezelayo.
UMnu. Tendai Biti omele abahambise udaba lolu emthethwandaba utshele intathelizindaba eHarare ukuthi uMugabe wayekhulumele eceleni ngokwenziwa ngomantshi labehluli bemithethwandaba.
"Hala mvumo yokukhuluma lokho. Isisekelo sombuso welizwe kasimvumeli ukuthi akukhulume. Umongameli kumele avimbe ngasosonke isikhathi ukuthi abantu bengephuli iziqondiso zesisekelo sombuso welizwe. Nxa umongameli eseyehlulekile kumele aphume esikhundleni kumbe kumele idale lephalamende limxotshe (He has no right to make those statements. The president's statement's statements are unconstitutional. The first function of the president is to uphold the constitution and the bill of rights. So if the president fails in that function he must resign or be impeached.)"
Kasenelisanga ukukhuluma leziphathamandla zikahulumende ngodaba lolu.