Sokulabantu abafika phose amatshumi ayisithupha – 56 asebegule umkhuhlane weCoronavirus COVID-19 eZimbabwe.
Phakathi kwabantu laba, sokusile abangamatshumi amabili lantathu - 23 kwabhubha abane. Uhlangothi lwezempilakahle luthi sokuhlolwe abafika phose inkulungwane ezingamatshumi amane lasikhombisa – 36,538.
Isibhedlela seJohns Hopkins University sibika njalo ukuthi emhlabeni wonke jikelele kulabantu abedlula izigidi ezinhlanu – 5,334,675 asebetholakale belomkhuhlane lo. Kunani leli, kulabafika inkulungwane ezingamakhulu amathathu – 341,513 asebebulewe yiCOVID-19 kube njalo labedlula isigidi asebesilile.
Umemetheka okumangalisayo umkhuhlane lo kwele Melika lapho osubulele abantu abafika phose inkulungwane ezilikhulu – 96,046.
Kusenjalo, kulabadakuka eZimbabwe abahlala kuzwekazi leNorth America asebebinge imali edlula inkulungwane ezilitshumi lantathu – 13,000 eyokuncedisa ukuvimba ukumemetheka komkhuhlane lo phansi komkhankaso obizwa ngokuthi ‘I Am For Bulawayo’.
Omunye wabadinga imali le nguMnu. Mcedisi Nkolomi, ohlala eDallas Texas, othi bakubone kufanele ukuthi badinge imali yokunceda idolobho lako Bulawayo elibhekane lomkhuhlane lo.
Umgcinisihlalo womkhankaso lo, uMnu. Busisa Moyo, uthi uqhubeka kahle umkhankaso wokuvimba ukumemetheka komkhuhlane weCoronavirus COVID-19.
Okwamanje ilizwe leZimbabwe liqhuba uhlelo lokuvalela abantu ezindlini ukwenzela ukuvimba ukumemetheka komkhuhlane weCoronavirus. Kodwa kulabantu abanengi abakhala ngendlala. Omunye wabo nguMnu. Mpumelelo Mafu ohlala eLupane esabelweni seMatabeleland North, othi impuphu kayitholakali esigabeni sakibo.
Banengi abakusimo esifanayo lobanje uhulumende esithi uzama ngamandla wonke ukunceda abaswelayo. Kodwa uMaNdlovu, ohlala eSt. Joseph eMatabeleland South, uthi kumele uhulumende ancedise abantu ukuthi bazithuthukisa hatshi ukuhlala ebadingela ukudla.
Odokotela bathi kumele abantu beqhubekela phambili ngokungahlangani bebanengi ukwenzela ukunqabela ukumemetheka komkhuhlane weCoronavirus COVID-19.