Abantu abane sebefake amabizo abo kukhetho lokudinga ozakhokhela inhlanganiso yenguqu elizweni eye Zimbabwe Football Association.
UMnu. Phillip Chiyangwa, uMnu. Trevor Carlisie Juul, uMnu. James Takavada loMnu. Leslie Gwindi bazangqikilana kukhetho lolu oluzakwenziwa ngoMpalakazi.
Abathathu laba benelise ukufake amabizo abo kudale le ZIFA Electoral Committee elibona ngokhetho lwenhlanganiso le.
UAlexander Maseko loBenjani Mwaruwari kukhanya bangenelisanga ukufaka amaphepha abo edale leli.
Ongena kukhetho lolu esekelana loChinyangwa, uMnu. Omega Sibanda, ofuna ukuba ngumsekeli kamongameli weZIFA, utshele iStudio 7 ukuthi bazanqoba kukhetho lolu.
“Singene kukhetho lolu ukwenzela ukuthi sinqobe sibesesilungisa okuhlupha umdlalo wenguqu eZimbabwe. Sileqiniso lokuthi sizalungisa konke okuhluphayo.”
USibanda wamiswa ukusebenza kuZIFA ngamakhansila enhlanhaniso le ngesikhathi exotshwa owayengumqondisi yawo, uMnu. Cuthbert Dube owayesetheswa icala lokwehluleka ukulungisa ububi bonke obusemdlalweni wenguqu.
Omunye okhanya ezangqikilana loSibanda nguMnu. Elkanah Dube owaye ngumsekeli womgcinisihlalo weqembu leHighlanders Football Club loMnu. Lincoln Mutasa owadlalela iqembu lenguqu eleDynamos.
UMaseko uthi okwamanje kwehlule kodwa uyabuya njalo ukuzencintisa kukhetho lweZIFA ngomnyaka ka2017.
“Kade kufunakala okunengi okunjenge ncwadi yamapholisa njalo lokuthi ngiveze incwadi zami zokuzalwa engizitshiye eSouth Africa. Ngizaphinda ngizame ukungena kukhetho lolu emnyakeni elandelayo.”
Abafuna ukungena kudale leZIFA Board bagoqela uMnu. Edzai Kasinauyo owayedlalela iqembu lama Warriors, uAdvocate Lewis Uriri, Mnu. Joseph Musariri weBeach Soccer, Mnu. Musa Mandaza, Mnu. Felton Kamambo lo Mnu. Piraishe Mabena.