Inhlolisiso eyenziwe yiwofisi kaAuditor General kusukela ngesikhathi kuqala ukumemethaka komkhuhlane weCOVID-19 kuveza ukuba yatshontshwa imali okwakumele incedise uzulu.
Ugwalo olujilileyo olwenziwe nguAuditor General, olwethulwe edale lephalamende, luveza ukuba lobanje uhulumende wayefake imali eceleni eyokunceda abantu ngesikhathi se lockdown abanengi kabatholanga limali.
Kugwalo luka Auditor General, olulotshwe nguNkosikazi Mildred Chiri, kuvezwa ukuba akucaci indlela okwasetshenziswa ngayo imali edlula izigidi ezine owakumele incede amabhizimusi amancane avalwa ngesikhathi kumemetheka umkhuhlane weCOVID-19, imuli ezidubekayo, labagogekileyo.
UNkosikazi Chiri uveze ukuba ugatsha lwabatsha lezemidlalo lwanikeza abahlabeleli ababebanjwe iCOVID-19 imali yokubasiza kungalandelwa indlela zokuphiwa kwemali njalo kungelabufakazi bokuba abantu laba babengabaculi kumbe hatshi.
Uphinde waveza ukuba indawo ezazigcina abantu abalomkhuhlane weCOVID-19 ama-quarantine centres impahla yayithengwa okungekho emthethweni kuthi izisebenzi kwesinye isikhathi zazingaphiwa imali.
Okunye okungazange kuthokozise uNkosikazi Chiri yikuba umsebenzi wawungahambi kuhle yena uhulumende wayebeke imali yokuncedisa ngesikhathi seCOVID-19.
Njengomzekeliso kuthiwa mhlaka 12 Mpalakazi, 2020, uhulumende wahlawula imali efika izigidi ezilikhulu lasitshiyangalombili – US$180 million eyokulungiisa kuma isolation centres kodwa imali le kayenzanga umsebenzi.
Isikhulumeli seCrisis in Zimbabwe Coalition, uMnu. Marvelous Khumalo, uthi bakhathazwa ngokuphume kugwalo lolu ngakho-ke kumele bavezwe bonke abantu abatshontshe imali le.
“UNkosikazi Chiri wenza umsebenzi omkuhlu kakhulu ngokukhipha inkohlakalo eyayisenzakala ngesikhathi kumemetheka iCOVID-19 abantu laba besebenzisa amabizo amanga.”
UKhumalo uthi kuyadanisa ukuba imali enengi kakhulu itshontshwe ngabasebenzela uhulumende labangane babo.
“Konke lokhu kwakusenzelwa ukunceda abantu ngesikhathi izinto zinzima. Sifake isicelo kuphalamende ukuba ihambise udaba lolu phambili. Bonke abantshontsha izimali kumele babotshwe baye emajele.”
UKhumalo uthi abantu bafuna ukubona labo abenzalokhu bevalelwa ejele.
Umsekeli womphathintambo wezempilakahle, uDokotela John Mangwiro, utshele intathelizindaba ukuba indaba zonke ezikugwalo luka Auditor General kazilani logatsha lwakhe.
Umphathintambo obona ngenswelo lokugcinwa kukazulu, uMnu, Paul Mavhima, uthi bazalohlolisisa ugwalo olwethulwe nguNkosikazi Chiri.
“Sesizwile ngemibiko leyi. Sizafuna ukuba sizwe ukuba kwenziwani. Okokuthi kwakulabantu ababethatha imali kungamelanga bathola yinto esayilungisayo. Ugwalo lolu sizalukhangelisa kakuhle.”
Abanengi bayakhala elizweni besithi kabatholanga usizo lwemali ngesikhathi kulemadlana yokunceda ababhekane lobhubhane lweCOVID-19.
Ibhanga leWorld Bank lakhipha imibiko kumaviki asanda kwedlula ethi iCOVID-19 yatshiya abanengi bengabayanga kwele Zimbabwe.