Abantu abanengi bakhangelelwe ukuthi bazatshengisela emigwaqweni namuhla ekuseni edolobheni lako Bulawayo besekela induna uNhlanhlayamangwe Ndiweni ohlaselwe ngoLwesibili ngabacatshangelwa ukuthi ngamapholisa ensitha.
Abahlasele induna le baveze ukuthi bavela ewofisini kaMongameli Emmerson Mnangagwa okukhanya engathakazeleli inkulumo kaNdiweni eyokuthi kumele kufakelwe inkokheli yebandla leZanu PF ezinye izijeziso zenotho.
UNdiweni ufisa njalo ukuthi kungabi labantu abavunyelwa ukusondela entabeni lapho uMzilikazi kaMatshobana owathi kususelwe amanqe induna ezazifuna ukubeka esikhundleni sakhe omunye umntwana wakhe kungaziwa ukuthi yena wayangaphi.
UNdiweni uthi iligugu indawo yeNtabazinduna lapho uhulumende osefake khona abalimi okubikwa ukuthi kabadabuki eMatabeleland.
Kasenelisanga ukukhuluma ngodaba lolu leziphathamandla zikahulumende kanye lesikhulumeli sikamongameli, uMnu. George Charamba. Abazaphatheka ekutshengiseleni lokhu bathi kulihlazo ukukhahlameza induna.
Omunye wabakhuthaza ukuthi uzulu atshengisele emgigwaqweni nguMnu. Nkululeko Mathe othi uhuhlukuluzwa kukaNdiweni kuveza ukuthi uhulumende udelela isizwe sikaMthwakazi.
Kodwa uMnu. Believe Gaule okubandla leZanu PF uthi induna uNhlanhlayamangwe Ndiweni ukhanya esengena ezombusazwe hatshi ukuthi ufuna ukulungisa okuhlupha uzulu.
UNdiweni uthi kalasifiso ngitsho lakancane ukuthi angene ezombusazwe.
Abanye abantu abavumelani lokwethulwa nguMnu. Believe Gaule. Omunye wabo nguMnu. Carnicious Nkala okubandla leZapu, othi kumele abantu basekele induna uNdiweni.
Akwaziwa ukuthi uhulumende uzangenela yini kudaba lolu osolumemetheke emhlabeni wonke jikelele.
