Unobhala wohlangothi lukahulumende olubona ngokwethulwa kwemibiko, uMnu. George Charamba, uthi uMongameli Emmerson Mnangagwa, owethekelele uMnu. Morgan Tsvangirai ogulayo ngoLwesihlanu, ubengenzeli ukukhankasela ukhetho oluzayo.
UCharamba utshele iStudio 7 ukuthi uMnangagwa wenze lokho ngoba ukhokhela ilizwe lonke okugoqela labaphikisa uhulumende webandla leZanu PF.
“Ngibona engani abazi ngezombusazwe bayakwazi nxa numele bagqoke umbala welizwe lombala wamabandla. Okwenziwe nguMongameli Mnangagwa kutshengisa ukuthi ubelombala welizwe njalo wethekelele umuntu oqakathekileyo ongezwa kahle emzimbeni. Wenze lokhu eveza ubuntu bakhe njalo ubesenza umsebenzi wakhe welizwe.
“Ngiyakwazi ukuthi kulabantu abahle babona ezombusazwe zisetshenziswa kuloludaba nxa bebona ababili laba besenza umhlangano. Ayisikho lokho okwenze uMnangagwa wethekelela uTsvangirai.”
UCharamba, oyisikhulumeli sikamongameli, uthe uMnangagwa ubengakhankaseli ukhetho oluzayo ngokuyabona uTsvangirai olesifo semvukuzane.
“Labo abatsho njalo libabuze ukuthi yindaba bengabuzanga ukuthi uTsvangirai wayengenzi okufanayo esemkhosini wokugcotshwa kuka Mnangagwa. Wayekhankasela ukhetho na uTsvangirai? Nxa kuyikuthi kunjalo kutsho ukuthi izandla ziyagezana.”
Uthe sesiphelile isikhathi sokubona abantu njengokuthi bakubandla liphi ngoba uhulumende kaMnangagwa uqakathekisa ukuthi abantu yizizalwane zeZimbabwe hatshi ukuthi ngabebandla leZanu PF, MDC kumbe amanye atshiyeneyo.
Kodwa-ke isikhulumeli sikaTsvangirai, uMnu. Luke Tamborinyok, uthi kusobala ukuthi uMnangagwa wayekhankasela ukhetho ngesikhathi esethekelela uTsvangirai.
“Kusobala, kusobala ukuthi wayekhankasela ukhetho. Ungeke wakhangela eceleni uthi ayisikho ayekwenza. UMnangagwa wathatha ithuba leliyana ukuthi aziveze emphakathini njengomuntu ongcono kulo Tsvangirai njalo owenza ngcono kulowayengumongameli uMnu. Robert Mugabe.
“Kodwa-ke okuqakathekileyo yikuthi uTsvangirai wahle wathatha ithuba lelo ukuthi akhulume ngakho konke okuhlupha abantu beZimbabwe. Lokhu kugoqela ukuswelakala kwemali, ukuswelakala kwemisebenzi lokuthi kumele kube lokhetho olubalulekileyo kwele Zimbabwe.”
Uphinde wathi loba kunjalo, uMnangagwa utshengise ubuntu ngokuyakhengela uTsvangirai ogulayo.
UTsvangirai usekwele South Africa lapho ayelatshwa khona.