Inhlanganiso ebona ngokuqhutshwa kokhetho eye Zimbabwe Election Commission (ZEC) ithi asesemaphethelweni amalungiselelo okhetho lwama by-elections oluzaqhutshwa ngoLwesithathu kuyonale iviki lapho okuncintisa khona ibandla leZANU PF lamabandla ezombusazwe aphikisayo.
Lokhu kwenzakala abalwela amalungelo oluntu besithi ibandla leZANU PF lisebenzisa inhlelo zikahulumende ukuhuga abantu ukuthi belivotele. Ezigabeni ezigoqela iHurungwe West, uMnu. Themba Mliswa oncintisa ezimele usekhweze emthethwandaba udaba lokuthi kumiswe lolukhetho ngenxa yodlakela, athi lubangelwa libandla leZANU PF.
Ngempelaviki edluleyo, abasekeli bakamongameli welizwe oMnu. Emmerson Mnangagwa loMnu. Phelekezela Mphoko babikwa betshele umhlangano walelibandla eTsholotsho North lapho okuncintisa KHONA uMnu. Jonathan Moyo ukuthi kufanele bevotele i-ZANU PF ukwenzela ukuthi bephatheke kunhlelo ezizabancedisa empilweni.
Kodwa uMnu. Believe Gaule, okhankasela uMnu. Moyo, usanda ukutshela iStudio 7 ukuthi inhlelo lezi zasungulwa ukhetho lungakafiki.
UMnu. Busani Ncube, oncintisa ezimele eTsholotsho North, utshele uSithandekile Mhlanga weStudio 7 ukuthi uhlangana lengxaki ezinengi nxa efuna ukukhankasela lolukhetho.
