Umthethwandaba kamantshi wakoBulawayo ngoLwesibili uphe amakhosikazi ahlala eNgozi Mine amahlanu, imvumo yokuthoniswa bevela emakhaya abo kungela kuhlawulela isibambiso sebail kodwa abanye abathathu babikwa bezoqhubeka bevalelwe njalo bazabe besenkantolo ngoLwesithathu.
Abafana abasakhulayo abahlanu labo abaphiwe imvumo yokuzothoniswa bevela emakhaya bengahlawulanga isibambiso icala labo lidluliselwe phambili kusasa behlangene labazali babo abalitshumi.
Umthethwandaba uthonise amacala amanengi agoqela okuthumba lokubhidliza impahla. Amacala la athiniswa nguMantshi uSithembiso Ncube kuthike umtshutshisi nguNkosaazana Portia Mashazhu obephikisa ukuvunyelwa kwabesifazana abayisificaminwe mibili ukuthi bahlawule imali yesibambiso sebail lababhekane lecala lokweba impahla koSpar eRichmond.
UMantshi Ncube uphe omama abahlanu abalensane imvumo yokuthonisiswa bevela emakhaya abo bengahlaulanga isibambiso sebail esithi akusimlandu wabo ukuthi icala selilamaviki amabili lidluliselwa phambili kungela bufakazi.
Abantu abalitshumi lanhlanu abahlala eNgozi Mine bamelwa ligqwetha le Zimbabwe Lawyers for Human Rights, uMnu. Tinashe Runganga.
URunganga uthi abantu laba abalacala. “Abantu laba kuhlanganisa labasakhulayo abahlanu abahlala eNgozi Mine babotshwa bezihambela becalwa ukuba bafuna ukuya gqekeza emavinkilini eSpar eRichmond bengaphathanga lutho kodwa uhulumende wathi ucabangela ukuba bafuna ukuyagqekeza njalo akulabufakazi obukhomba ukuba bebesiyatshontsha impahla.”
Ababotshwe eNgozi Mine babalisa uConsatine Ncube, Sehliselo Ncube, Ntandoyenkosi Moyo, Siphathisiwe Nyandeni, Phathisani Moyo, Clinton Nyathi, Wilson Nyathi, Maureen Moyo, Ellita Sibanda lo Enviyoletter Moyo kuhlanganisa labafana abancane abahlanu abamiswe phambi kukaMantshi uNkosikazi Ncube.
Abavunyelwe ukuthonisiswa bevela emakhaya kungela nhlawulo yesibambiso sebail, babalisa uNtandoyenkosi Moyo, Phathisani Moyo, Ellitta Sibanda, Sehliselo Ncube loEnvyolleta Moyo ngoba belezingane.
