Abantu bakoBulawayo bamanyene labanye emhlabeni wonke jikelele emkhankasweni wemfundiso lokulimukisana ngomkhuhlane wemvukuzane yebele ngalinyanga eyeBreast Cancer Month ngokuba lomkhosi oqoqwe ngabebandla leZapu obulabomama abambalwa abaphepha kulumkhuhlane.
Abebandla leZAPU bathi baqoqe lumkhosi ngokunanzelela ukuqonga kwenani labantu asebebanjwa yilo umkhuhlane bekhuthaza uhulumende ukuba athathe amanyathela.
UDokotela Mildred Mnkandla, obona ngezemfundiso kuZAPU owasila kumkhuhlane wemvukuzane yebele eminyakeni engamatshumi amabili lanhlanu edluleyo, uthi kuqakathekile ukuhlolwa lokwelatshwa lumkhuhlane kusasemasinya.
Uthi injongo yokuphatheka kwabo emkhankasweni walonyaka kuyikukhuthaza ukwelatshwa kwalo umkhuhlane kungelambadalo ilizwe lonke.
"Umhlangano lo injongo yawo bekuyikufundisa uzulu ngalo umkhuhlane njengoba sikunyanga yokunanza lumkhuhlane. Umkhuhlane lo uyadula ukuba welatshwe njalo kuqakathekile ukuba bayenelise ukwelatshwa kuzozonke izabelo ukuze omama bengahambi umango omude."
UDokotela Mnkandla uthi selesikhathi eside wasila kulo umkhuhlane.
“Sengileminyaka engamatshumi amabili lanhlanu lenyanga eziyisificamunwe munye ngasila kulo umkhuhlane. Kuqakathekile ukuba abantu bazi ngalo umkhuhlane, njalo lumkhuhlane ubungaqakathekiswa izolo. Ngikhangelele ukuba uhulumende aqakathekise ukwelapha umkhuhlane wemvukuzane ngokutshiyana kwayo ukuhlasela izitho zomzimba. Kulusizi ukuba abongi labodokotela abasaqakathekisi izigulane sebeziqakathekisa bona ukwedlula izigulane.”
UNkosikazi Phoebi Chikonye oseleminyaka emihlanu wasila kumkhuhlane wemvukuzane yebele uthi udubo yikuthi abezempilakahle labo abaselathando lezigulane.
“Umkhuhlane wemvukuzane wangihlasela kuminyaka emihlanu edlule. Udubo olukhona yikuthi odokotela bayethusela izigulane. Mina udokotela engaqala kuye wangethusela ngaze ngacina ngisiyadinga ukwelatshwa kwele South Africa.”
Uthi eZimbabwe kuyadula ukwelatshwa nxa kuqathaniswa lakweleSouth Africa.
“Mina ngiyelatshwa kwele South Africa njalo kuphansi kakhulu uma ngiqathanisa lalapha ekhaya. Ngiyakureview nemva kwe6 months njalo loma ngingalamali bayangelapha ngithi sengibhadala ngingathola imali abangihlukuluzi. Kulesikhathi engasengilesikwelede esikhulu kodwa kabazane beme ukungelapha."
UNkosikazi Molly Richarson, oleminyaka eyisikhombisa laye owaphepha kulo umkhuhlane, uthi kuyadula ukwelatshwa umkhuhlane wemvukuzane ngakho-ke ucela uhulumende ukuba atholise abantu imithi.
“Umkhuhlane wemvukuzane uyadula ukwelapha njalo sicela uhulumende atholise abantu amaphilisi ngoba abanye bayafa ngoba beswele imithi. EHarare kuleCancer Association iyasiza abantu ngapha thina asilayo, kulephilisi olinatha okweminyaka emihlanu ungaqala ukwelatshwa, kuyadula ukulithenga. Kulezi insuku kunzima bafuna idola lemelika esingelalo njalo leMedical Aid kithi abadala ayisasebenzi sicela ukuba uhulumende angenele imithi yokwelapha imvukuzane isidula."
UMnu. Titus Chikonye, olekhosikazi lakhe elaphepha kumvukuzane yebele, uthi kunzima ukunakekela isigulane.
“Umkhuhlane wemvukuzane uyadula ukwelapha njalo uma usuthe wafika emulini kumele libambane. Ngabe uhulumende ubalecebo lokusiza abantu abalomkhuhlane wemvukuzane njangakwamanye amazwe. Akulula ukwelapha lumkhuhlane, kunzima njalo uyadla esambeni.”
Obona ngezempilo kubandla leZAPU, uDokotela Nikela Ndebele, uthi udubo olukhona ngemvukuzane yebele yikuba omama bayaphuza ukudinga usizo lokwelatshwa.
“Umkhuhlane wemvukuzane usuthe waphazamisa omama abanengi kakhulu kodwa bafika ukuzodinga usizo umkhuhlane usuphezulu kodwa inengi liyafihla, njalo liyesaba."
Inyanga kaMfumfu yahlelwa ngumhlaba jikelele ukuqakathekisa imikhankaso yokulimukisa uzulu ngomkhuhlane wemvukuzane yebele, iBreast Cancer Awareness Month.
Lumkhuhlane uhlasela omama lehlekana labobaba, abantwana, amantombazana labafana.
Phansi kwalu mkhankaso abantu bakhuthazwa ukuyahlolwa kungela mbadalo ezibhedlela zakoBulawayo eUnited Bulawayo Hospitals leMpilo Central Hospital.