lnhlanganiso elwela amalungelo oluntu eyeMatabeleland Institute for Human Rights isiyethule umbiko oveza ukuba ezinye izibholani koBulawayo zilamanzi angcolileyo angafnelanga ukunathwa ngabantu.
Abenhlanganiso le bathi bathole ubufakazi obuveza lokhu kumpumela yophenyo olwenziwe yikhansili.
lkhansili yedolobho lakoBulawayo ibhekane lodubo lukukhela abantu amanzi ahlanzekileyo isikhathi esinengi osokusenza izakhamizi zeminye imizi yaleli dolobho ibhekane lohlupho lokuqhamuka kwemikhluhlane yesihudo.
Umqondisi weMatabeleland Institute for Human Rights, uMnu. Khumbulani Maphosa, uchasisa kabanzi ngombiko ophathelane lamanzi akoBulawayo.
"IBulawayo City Council kayihloli sikhathi sonke amanzi ezibholane, izibholane ngomnyaka ka2019 ihlole kanye izibholane izingu 176 phakathi kweziyi 350. Kuzonalezo eziyi176 ezingu 33 zakhona zitholakale zilecolifom zingcolile, ezine zazo zitholakale zilencgekeza yangasese."
Ngomnyaka ka2020 uBulawayo ubhekane lodubo lwamanzi olukhulu ukwedlula eminye iminyaka okudale ukuba abantu babanjwe yimikhulane yesisu, isikhumba kuthi abanye balahlekelwa ngumphefumulo.
UMaphosa uqhubeke usole umanisiphala wakoBulawayo ukuba akenzanga umsebenzi wakhe ngokupheleleyo.
"Ngomnyaka ka2020 abantu lapho abakade behlupheka kakhulu ngamanzi ikhansili ihlole ezingu 23 phakathi kweziyi 350. Ngalesosizatho ikhansili ayilabufakazi bokuthi aanzi asezibholaneni ahlanzekile zona zingahlolwanga ngesikhathi abantu bengelamanzi belala ezibholaneni bebenatha njani amanzi angahlolwanga."
Okugcizelelwe ngomunye wabalwela amalungelo oluntu uMnu Effie Ncube.
"Kubuhlungu kakhulu ukuthi abantu belinde amanzi bacina belungiselwa amaborehole kutholakale ukuthi banatha ingcekeza, kudingakala ukuba ikhansili iphakamele phezulu masinya ngaba kulakho ukuba kungaqhamuka imikhuhlane ebangelwa ngamanzi ityphoid, idysentry ocholera lokunye okungaletha ukufa kwabantu abanengi. Amanzi aqakathekile alilungelo lomuntu wonke ngakho ke kuqakathekile ukuba ikhansili ikulungisise masinyane okwezibholane."
Isakhamuzi sakoBulawayo, uNkosikazi Nokuthula Mafu, uthi bona emzini ahlala kiwo, amanzi bayawathola kodwa abalephunga.
"Lokhe umnyaka uqalile amanzi siyawathola empompini kodwa ngesinye isikhathi abuya engcolile, kuthi ngamanye amalanga ayabe enuka ilongwe lomuntu njalo lamabill aphezulu siwabhadalela kunjalo loma engcolile kukhansili."
Ikhansili yedolobho lakoBulawayo ikhuphe imibiko ngenyanga edluleyo kuFuture Water Supplies Report ukuba kumnyaka odlule bahlole izibholane ezingamatshumi amabili lantathu bafumana ukuthi amanzi la alungele ukuba uzulu engawanatha.
Kusenjalo, ikhansili isithe yavalela abantu amanzi ngesikhathi ilungisisa isithitshi samanzi esadabukayo eseNcema Reservoir sona esithela eseTuli Resevoir.
UMabhalane wekhansili yakoBulawayo, uMnu Christopher Dube, uthi ukuvalwa kwamanzi kuqale NgoMvulo kuyaphela ngoLwesihlanu emini yantambama.
Uthi indawo eziyabe zingelamanzi yiEsigodini, Imbizo Barracks, Fortunes Gates, Selborne Park, Mahatshula, Woodville, Kingsdale, Lockville, Sunninghill,Marlands, Glencoe, Riverside, Waretford, Manningdale, Willsgrove, Buenavista leDouglasdale.
Izakhamizi zakoBulawayo zihlala zibhekane lodubo lwamanzi, minyaka yonke kodwa okomnyaka odluleyo zithi bekuphambili lapho izakhamizi ezike zathola amanzi kanye Phakathi kweviki ezimbiuli kwaze kwabanganeno lonyaka ngemva kokuna kwezulu. Kodwa lokhe ekhona amalokitshi angela manzi anjenge Pumula South, Cowdray Park, Nkulumane lamanye.