Iziphepheli ezihlala eMethodist Church, eJohannesburg bezilokhu zingakasuki kulindawo ngoLwesithathu lanxa bezilaywe ukuthi zibe seziphume zaphela ngokutshona kwelanga.
Iziphepheli lezi zedlula amakhulu amane njalo ezinengi zazo yizizalwane zeZimbabwe ezithi zabalekela ukuhlukuluzwa ngabasekeli beZanu PF.
Abantu laba bahlaliswa eCentral Methodist Church nguBishop Paul Verryn kusukela ngomnyaka ka2000.
Kodwa iziphathamandla zalinkonzo zinqume ukubaxotsha kusikhatshana esedluleyo zisithi le kumele kube yindawo yokukhonzela kuphela hatshi eyokuhlala.
Iziphathamandla lezi zithethe isinqumo lesi ngemva kokususa uBishop Verryn kulinkonzo zamupha umlandu wokuyasebenzela enkonzweni eseSoweto.
Kodwa uVerryn utshele iStudio 7 ukuthi abantu laba kabasoze baxotshelwe iganga. Uthi banengi asebemtshayele incingo besithi bafuna ukubancedisa ngendawo zokuhlala.
Sixhume isiphathamandla senhlanganiso yeCommunity of Zimbabweans in South Africa uMnu Gift Eglone yena othi labo baphakathi kokudingela iziphepheli lezi indawo zokuhlala.
