UHulumende wethule iziqondiso zokuthi abantu behlale ezindlini okwamaviki amathathu alandelayo, bephuma kuphela uma besiyakwenza okuqakathekileyo, phansi kwemizamo yakhe yokumisa ukumemetheka lokuthelelanwa kwegcikwane eleCOVID-19 lona eselithethe umphefumulo womuntu oyedwa eZimbabwe.
UDokotela weMatabeleland North province uPurgie Chimberengwa uchaza isimo esikhona ngomkhulane we COVID 19 esigabeni sakhe kanye lendoda efunyenwe ilaleli gcikwane eVictoria Fall.
''Umkhuhlane weCOVID -19 ukhona eVictoria Fall, undoda olalo umkhuhlane sesalandelela bonke abnatu ahlangana labo sabahlola abalalo leligcikwane siqhubekela phambili silivikela leligcikwane lobanje kungakabi lomuthi owelapha leligcikwane. Undoda lo usesibangcono kulandela ukuthola ekuhlolwa''
Uqhubeke phambili uChimberengwa esithi sebeyenze amatest athize.
''Okwakhathesi sesayenza amatest alitshumi lanye phakathi kwabo ngoyedwa olalo umkhuhlane kuqakathekile ukuhlala uhlanzekile uzivikela kulo umkhuhlane umuntu engabambi amehlo lobuso njalo ahlale egeza izandla ukuze senqabele ukubamba lumkhuhlane.''
Esinye isakhamuzi sakobulayo uMnu Michael Ndiweni upha umbono wakhe ngalumlayo kahulumende wokuthi abantu bahlale emizini yabo bengabuthani, njengendlela yokuzivikela ukuthelelwa igcikwane leCoronavirus.
''Indaba yokuthi abantu bahlale emakhaya ngike ngabhodabhoda ngihlola isimo inengi ikakhulu abantu abaphila ngokuthengisa bathi sebelahlekelwe kakhulu libhizimusi, abanye abalamanzi ezindlini kanye lempuphu njalo inengi alazi ngalo umkhuhlane wegcikwane kuhle ukuthi bafundiswe. Okungithinte kakhulu yindaba yomthelo wezindlu lokusilela kokudla lamanzi kungabakuhle uma uhulumende engangenela kudaba lwemithelo yezindlu ngoba abantu abalamali abazabe beyenza ngesikhathi behleli emakhaya
Okwamanje izisebenzi zempilakahle omongikazi labodokotela lokhu beqhubekela phambili bekhalale umsebenzi bekhala ngokuthi abalampahla zokuzivikela ngesikhathi beselapha uzulu njalo bathi lemithi ayikho ezibhedlela. Idolobho lakoBulawayo lokhe lilinde imithi evela esiphaleni semithi sikahulumende ukuze izilungiselele ukwelapha abantu abazabanjwa yiCOVID-19,
Edolobheni lokhe kungakabi ngitsho lesibhedlela esisodwa esesilungele ukwamukela abantu ababanjwa yilo umkhuhlane.
Okwamanje, njengoba kungakabi lomuthi wokwelapha iCOVID-19, uhulumende wethule iziqondiso zokuthi abantu bahlale emakhaya bengayi emsebenzini okwamaviki amaththu njengendlela yokumisa ukuthelelanwa leli gcikwane, lokundoloza ukuhlanzeka lokuzivikela.
