Ibandla leZanu PF lithi sesifikile isikhathi sokuthi abantu besebenze ndawonye ukwenzela ukuthuthukisa ilizwe elifikise iminyaka phose engamatshumi amane kazibuse izolo.
Abalandeli bebandla leli bathi kumele uzulu akhumbule ukuthi kwabhubha abantu abanengi ngesikhathi sempi yenkululeko ababefuna ukuthi ilizwe libelozibuse.
Kodwa banengi kakhulu abakhala ngokwenzakala elizweni abathi uhulumende kaMongameli Mnangagwa kumele aguqule ezombusazwe lezomnotho ukuze kubelenhlalakahle eZimbabwe.
Omunye wabakhuthaza ukuthi kulondolozwe izifiso zabalwa impi yenkululeko nguMnu. Joseph Tshuma okubandla leZanu PF.
Bayakhala abantu kwele Zimbabwe abathi bekunzima ukuthakazelela uzibuse ngenxa yokuthi bathwele nzima ngokuphandela imuli zabo ukudla.
Bathi bayakwazi ukuthi ilizwe lakhululwa nzima kodwa sokumele ukuthi khathesi ngasebehlezi kahle.
Omunye wabakhala ngokwenzakala elizweni nguMnu. Percy Mcijo, umqondisi wenhlanganiso yeStreetwise Informal Traders Association, othi abathenga bethengisa impahla bathwele nzima eZimbabwe.
Uhulumende kaMnangagwa uthi uzama ngamandla wonke ukuthi aguqule isimo esibi somnotho ngokukhulumisana lamazwe atshiyeneyo ukwenzela ukuthi kutholakale imali yokuvuselela amafekithali asetshaywa ngumoya eZimbabwe.
