Kulosakhulayo webandla leMDC-T olaliswe esibhedlela njalo abanye abedlula itshumi bebeselatshwa ngoMvulo ngemva kokutshaywa ngamalunga eZanu PF eHarare.
Abasakhulayo laba bathi batshaywe amapholisa ebukele eMbare ngeSonto ngesikhathi bezama ukwenza umhlangano webandla labo.
Omunye wabatshayiweyo laba uMnu David Mazibiye uthi umanxebanxeba umzimba wonke njalo uthi ulaliswe esibhedlela okwamahola ayisikhombisa ngeSonto.
Ubuyelile ngoMvulo ukuyahlolwa lokuphiwa imithi.
"Ngilimele lemzimbeni wonke. Bangitshaye ngaqaleka phambi kwamapholisa njalo okumangalisayo yikuthi kazange enze lutho," kuchasise uMazibiye.
Umqoqi wenhlelo zeMDC-T uMnu Abednico Bhebhe usole kakhulu udlakela lolu.
"Udlakela lolu lutshengisa ukuthi iZanu PF libandla lodlakela. Lapha sebezama ukwethusela abantu ngaphambilini kokhetho luka2018," kutsho uMnu Bhebhe.
