UMongameli Emmerson Mnangagwa usefikile eNew York kwele Melika lapho azakwethula khona umbiko wakhe ngoLwesithathu emhlanganweni weUnited Nations General Assembly.
UMnangagwa uhamba labakhokheli benhlangothi ezitshiyeneyo zikahulumende abagoqela uMnu. Sibuso Moyo, umphathintambo obona ngezokudlelana lamanye amazwe, usibalukhulu webhanga leReserve Bank of Zimbabwe labanye.
Ukhangelelwe ukuthi uzakwethula okutshiyeneyo emhlanganweni lo okunjengezijeziso zenotho ezafakelwa inkokheli yebandla leZanu PF. UMnangagwa uthi izijeziso lezi zibhidliza umnotho welizwe leZimbabwe.
Kulabantu abatshengisele ngoMgqibelo emigwaqweni bechothoza uhulumende kaMnangagwa kuthi-ke abanye abakuhlanganiso yeDecember 12 Movement labo batshengisele besekela uhulumende weZimbabwe.
Omunye walabo abatshengisele eNew York nguMnu. Tamburai Mpariwa Gwekwerere okubandla leMDC elikhokhelwa nguMnu. Nelson Chamisa.
Uthi bavezele uzulu ukuthi izijeziso zenotho kayisizo ezithumba abantu njalo ezibhidliza umnotho welizwe leZimbabwe.
"Sebekwazi abantu abanengi okwenzakala eZimbabwe hatshi lokhu okutshelwa abantu nguMnangagwa labanye bakhe. Sizaqhubekela phambili ngoLwesithathu sitshengisela lapha eMelika."
UMnu. Joseph Tshuma, owake wamele iPelandaba Mpopoma edale lephalamende ekubandla leZanu PF, uthi kuyamangalisa ukuthi abadabuka eZimbabwe batshengisela kwele Melika befuna ukuthi izijeziso zenotho zingesulwa.
"Kambe kuyini khonokhu okwenziwa yizizalwane zeZimbabwe ezisuka ekhaya zisiyatshengisela eNew York. Kuyayangisa lokhu."
Inkokheli yebandla leZanu PF yafakelwa izijeziso zenotho ngamazwe entshonalanga isetheswa amacala okwephula ilungelo loluntu.