Ukuthoniswa amacala etheswa owayengumongameli wakwele Melika, uMnu. Donald Trump, kungene kusuku lwesithathu namuhla abatshutshisi belokhu besethula ubufakazi abathi buveza ukuba uTrump wephula isisekelo sombuso welizwe leminye imithetho ngokutshotshozela abalandeli bakhe ukuba bwngene ngenkani eCongress kubalwa ama-electoral votes ngoZibandlela.
Kukhangelelwe ukuba abatshutshisi abakubandla lama Democrats bazaqhubekela phambili besethula ubufakazi abafisa ukuba busetshenziswe ngamalunga edale leSenate ekujeziseni uTrump.
Abatshutshisi laba bazagqiba ukwenza lokhu namuhla kubesokungena amagqwetha kaTrump kusasa alokhu esithi uthoniswa okungekho emthethweni njengoba sewaphuma esikhundleni sikamongameli.
Omunye wabatshutshisi, uRepresentative Jamie Raskin, utshele idale leSenate izolo kusihlwa ukuba uTrump kumele atholakale elecala.
"Wephula isifungo sokulandela, ukulondoloza lokuvikela isisekelo sombuso welizwe. Watshotshozela abalandeli bakhe ukuba bangene eCongress ukwenzela ukuthi kuvinjwe impumela yokhetho.”
Omunye njalo umtshutshisi, uRepresentative Joe Neguse, uthe kusobala ukuba uTrump wayefuna ukuhlala ngenkani esikhundleni sikamongameli.
“Wayefuna ukumisa ukubalwa kwama voti ngoba wayefuna ukuhlala esikhundleni. Kwathi sokuqhamuke udlakela eCongress kazange enze lutho ngalokhu. Kumele atholakale elecala.”
Baveze konke lokhu ngokutshengisa imifanekiso lama videos kaTrump, ukuxokozela okwadalwa ngabalandeli bakhe, lokwethulwa ngamapholisa njalo lomsekeli kamongameli, uMnu. Mike Pence, lamalunga eHouse of Representatives leSenate bebaleka mhlaka 6 Zibandlela.
UMnu. Busani Mbuso Ntini, olandela okwenzakala kwele Melika, uthi abatshutshisi beveze lokhu besenzela ukhumbuza amalunga edale leSenate okwenziwa nguTrump labalandeli bakhe.
UNkosikazi Priscilla Ndlovu, ohlala kwele Melika, uthi kungaba nzima ukuthi amalunga ebandla lama Republicans basekele okwethulwe ngabatshutshisi.
Lokhu kusekelwa nguMnu. Raphael Mthombeni laye ohlala kwele Melika.
Amagqwetha kaTrump akhangelelwe ukuba azangena edale leSenate kusasa ethule abacabanga ukuba kunganqunda okuvezwa ngabatshutshisi. Kukhangelelwe ukuba amagqwetha la azakwethula akufisayo okwamahola alitshumi lasithupha. Impumela yokuthoniswa kwamacala phansi kwalokhu okuthiwa yiImpeachment ngeSilungu, ilakho ukwethulwa ngempelaviki.
