Babuye ngobunengi abantu bezovalelisa umuyi uNdumiso Gumede, embuthanweni obuse Amphitheatre koBulawayo, namhlanje phambilini kokungcwatshwa kwakhe kusasa ekhaya lapho abedabuka khona eNyathi.
Ekhuluma ngesikhathi kukhunjulwa lokuthakazelela impilo kamfowabo endaweni yase Amphitheatre, udadewabo kaGumede, uThembelihle Mhlophe, uthe impilo kamfowabo ilandele igama aliphiwa ngabazali bakhe.
“UNdumiso uzelwe ngomnyaka ka 1945 wathiwa ibizo elithi nguNdumiso zika David Emmanuel Gumede.
Ibizo abamethesa lona lahle lamtshengisa ukuthi uNkulunkulu umusa ngaphi ngoba okwenzakeleyo empilweni yakhe uyakubona ukuba uNkulunkulu ubedumisa ngaye,” kutsho uMhlophe.
Osebenze loGumede kuqembu leHighlanders kanye lakuqembu leNotwane kwele Botswana, uLawrence “Lofty” Phiri, utshele uzulu obethe gwaqa eAmphitheatre kanye labakade bebukela ebulenjini ukuba uGumede ubhubhe ngesikhathi bephezu kokubumba inhlanganiso eyokuphathisa abasakhulayo.
“Ngikubona kufanele ngalesisikhathi ukuba ngazise imuli yako Gumede kanye loMthwakazi ukuba kulenhlanganiso esibizwe ngegama lika Gumede ethiwa yiNdumiso Gumede presidential trust.
Linhlanganiso izakwethulwa okusemthethweni ekupheleni kukaZibandlela,” kutsho uPhiri.
Inhlanganiso le iqalwe ngabagoqela abafundiswa ngu Gumede ngesikhathi sakhe esebenza engumbalisi kanye labakhokhele ngesikhathi eseyisiphathamandla somdlalo wenguqu.
Umphathintambo omele idolobho lako Bulawayo ephalamende uJudith Ncube ngomunye okhulume emkhosini wanamhlanje njalo uthe imisebenzi kaGumede iyazikhulumela.
“Silahlekelwe njengo Bulawayo, silahlekelwe njenge Zimbabwe. Ngimi lapha ukuthi ngethule ukukhala kukaMongameli.
Liwubonile umlayezo wakhe ekhalela imuli yako Gumede. Ngikhuluma kanje amaphepha, wonke umuntu ko Bulawayo, wonke umuntu eZimbabwe, ukhuluma ngokuthi indoda leyi isebenzile. Sonke siyavumelana ukuthi indoda leyi elele phambi kwethu yenzile umsebenzi wayo omuhle,” kutsho uNcube.
Abanye abakhulume namhla ngababalisa uDouglas Mloyi obemele abadlali abadlalela iqembu le Highlanders, uLuke Mkandla ongumkhokheli we bhodi yeqembu le Highlanders, uVincent Pamire obemele abasebenza lo Gumede kunhlanganiso ye Zimbabwe Football Association, abangane baka Gumede uRoger Muhlwa lo Peter Mthandazo Moyo kanye losodolobho lako Bulawayo uSolomon Mguni.
UGumede uzabekwa ngoLwesibili ekhaya kibo eNyathi