Banengi abadabuka eZimbabwe asebechapha imfula igcwele besiya kweleSouth Africa kumbe eBotswana ngemva kokuthakazelela ikhefu leKhisimusi lezihlobo labangane ekhaya.
Kulabachapha izifudlana ezigcweleyo labanye abangena kwemkhulu, egoqela uShashi kanye loLimpopo, olengwenya.
Sekuphume imifanekiso eminengi ebulenjini bokuxhumana itshengisa abeZimbabwe bechapha imfula egcweleyo sebebuyela emsebenzini emazweni angomakhelwane. Inengi elisebenza phandle kwelizwe seliphindela emuva ngemva kokudlala ikhefu leKhisimusi lezihlobo labangane ekhaya.
Kodwa kulokukhathazeka ukuthi labo abangalamaphepha okungena emazweni afana leBotswana leSouth Africa, bachapha imfula igcwele okubafaka engozini yokugalula, kumbe ukubanjwa zinyamazana ezifana lengwenya.
Inkundla zokuxoxisana lezokuxhumana ezifana leWhatsApp zilamavidiyo atshengisa abantu bechapha imfula egcweleyo sebebuyela kweleSouth Africa leBotswana. Omunye osanda kuchapha umgcele esebenzisa iganga, uMnunzana Ofias Sibanda, uthi akula abangakwenza ngaphandle kokuthi bachaphe imfula ukuze bengalahlekelwa yimsebenzi yabo.
"Ayisikho kuthanda ukuchapha imfula igcwele, yikufuqwa luhlupho. Ungakhangela iphasiphothi iyadula ngapho uyabe ufuna ukuthi ubuyele masinya ukuze uthole umsebenzi wakho ulokhe ukhona. Ungalinda ukwentsha kwemfula ungacina ungasaphendukanga."
Banengi abakusimo lesi abathi kungcono ukugalula kumbe ukubulawa zingwenya kulokuhlala eZimbabwe okungelamisebenzi. Inkokheli zenhlanganiso ezitshiyeneyo ezibona ngokwabadabuka eZimbabwe abahlala kweleBotswana lakweleSouth Africa, baxwayisa ukuthi kuyingozi okwenziwa ngabachapha imngcele bengena imfula igcwele.
UMnunzana Cephas Tshuma okunhlanganiso yeZimbabwe Community in Botswana uthi kuyethusa okwenzakalayo.
"Ipassport iyabiza ye kodwa ayisiwo mali enengi okokuthi usungaze uyefela emanzini. Kungcono ukuthi uyebotshwa emngceleni kulokuthi ufake impilo yakho engozini uyefela emanzini."
UTshuma uthi khona kuqakathekile ukuthi abantu babe lencwadi zokuhambisa, ikakhulu kukhangelwe ukuthi bangena kwelinye ilizwe, kungaziwa okungenzakala.
"Ugwalo lwe passport lufana lesithupha. Ukuyangena kwelinye ilizwe ungelaphepha uluthweleyo kuyahlupha. Ngibona ukuthi kumele abantu bakuzwisise lokhe bengakakhangeli ukuthi kanti vele ukuthola ugwalo lolu kuyimalini."
Umlayezo wehofisi yommeli weZimbabwe kweleBotswana ngowokuthi abantu kumele bethole incwadi ezibapha imvumo yokungena kwelinye ilizwe okusemthethweni, ukwenqabela ukuthi abantu bengazifaki engozini bezama ukuya kwamanye amazwe.
Umsekeli kammeli wehofisi ye Zimbabwe kweleBotswana, uMnunzana Witness Ngwenya, uthi ihofisi yabo yenza konke okusemandleni ayo ukuthi abantu bekhaya bethole amaphepha aqondileyo.
“Esikukhuthaza kakhulu yikuthi abantu babe lamaphepha. Kungangcono ubelephasiphothi noma ungela permit. Yikho okuqakathekileyo.”
UMnunzana Ngqabutho Mabhena ongumngcinisihlalo wenhlanganiso ye Zimbabwe Community in South Africa laye ugcizelela ngomlayezo wokusebenzisa indlela eziqondileyo zokungena kwamanye amazwe.
“Isixwayiso sethu yikuthi bengangeni emanzini. Kuqakathekile ukuthi abantu bethole incwadi zokuhmabisa, ama passport ukuze bangazitholi kusimo sokuthi bangene emanzini.”
UMabhena uthi kumqoka ukuthi uhulumende weZimbabwe ayehlise intengo yogwalo lwephasipoti, yona ebiza amadola angamakhulu amabili - $200.
“Siyakwazi ukuthi intengo yamaphasiphothi iphezulu kakhulu. Sithi uhulumende kehlise intengo ukuze abantu bahamba ngendlela eziqondileyo njalo ezisemthethweni.”
Inengi lachapha lisiya ekhaya izulu lingakani kakhulu kodwa kulez’insuku imifula phose yonke igcwele.
Kumbiko omumethwe kuphephandaba leChronicle, utshengisa ukuthi kusukela ngomnyaka ka2006 kulabeZimbabwe abafika ikhulu abagalula bezama ukuchapha besiya kweleSouth Africa.
Forum