Inhlanganiso yababalisi eye Progressive Teachers Union of Zimbabwe (PTUZ) ithi amalunga ayo asemaphandleni abangaba phose yisilinganiso sokungamatshumi ayisificamunwe munye ekhulwini bakhalale umsebenzi ngolweSithathu kulandela ukwehluleka kukahulumende ukuwakhuphulela iholo ngoNhlangula.
Umqondisi we PTUZ, uMnu. Takavafira Zhou uthi okwenze kwaba lenani lababalisi elinengi emaphandleni elikhalale umsebenzi nxa kuqathaniswa lemadolobheni lapho okulabalutshwana abenze okufanayo yikuthi kabatholi imali ephiwa ababalisi ngabazali yokubavusa idlabuzane lokusebenza.
Uphinde wathi abenhlanganiso yakhe abakhalale umsebenzi bayahlukuluzwa ngamapholisa, izikhotha mathe zebandla le ZANU PF kanye labaphathi bezikolo.
Kodwa-ke umqondisi weyinye inhlanganiso yababalisi eye Zimbabwe Teachers Association uMnu. Sifiso Ndlovu uthi imbiko evela ezabelweni lemadolobheni itshengisa ukuthi akulababalisi abakhalale umsebenzi.
Umbalisi ose Victoria Falls owale ukuqanjwa ngegama ugcizelele njalo esithi ababalisi kabasoze bakhalale umsebenzi njengoba lokho kungalethi mali.
