Bamukela Ukugqitshwa Kohlelo LweCoronavirus eBotswana

^{EleBotswana selifike ekucineni kohlelo lwayo lwe lockdown, okuzindaba ezinhle kwabanye abeZimbabwe abaphila kulelizwe akade sebephila nzima.}

^{Kodwa abadabuka eZimbabwe ababuyela ekhaya sokunzima ngesikhathi selockdown babhekane lobunzima bokuphindela kwele Botswana.}

^{Uhlelo lwelockdown kwele Botswana luphele phakathi kobusuku ngoLwesithathu kugqitshwa insuku ezingamatshumi amane latshiyagalombili (48), inengi labantu lihlezi ezindlini.}

^{Le bekuyindlela yokulwisana lokumemetheka komkhuhlane wecoronavirus COVID-19.}

^{Abanye abeZimbabwe abahlala kwele Botswana bajabuliswe yikwesulwa kohlelo lwelockdown, lona olukade selulethe ukuhlupheka kwabanengi, ikakhulu abaphila ngemisetshenzanyana, ama ‘piece jobs’.}

^{UNkosikazi Emily Moyo, ohlala eGaborone, uthi kuzindaba ezinhle ukuthi ilockdown isiphelile ngoba indlala ibe isingenele inengi…}

^{“Kugcono ukuzwa ukuthi ilockdown isiphelile, mhlawumbe sesingenelisa ukuphuma sidinge imsebenzi yokuziphilisa. Kade kungasaphileki."}

^{UMnu. Stan Ncube uthi bekufanele ukuthi uhlelo lwelockdown luphele ngoba umkhuhlane wecoronavirus ungabhahanga kakhulu kweleBotswana.}

^{“Ungakhangela abantu abanengi sebelimele kakhulu empilweni zabo ngenxa yohlelo lwelockdown. Inani labantu abalecoronavirus kwele Botswana liphansi, ngakho kulungile ukuthi uhulumende avulele abantu ukuze impilo kwezinye izigaba, iqhubeke. Abanye abakithi baphila kakhulu ngemsebenzi yama piece jobs, obe sekunzima kakhulu kibo ngesikhathi selockdown.”}

^{Kodwa indlela yabeZimbabwe abafuna ukuphenduka kwele Botswana ayilula ngoba imingcele phakathi kwamazwe womabili lokhe ivaliwe.}

^{Labo abalamaphepha okusebenza kwele Botswana uma bephenduka bazamele baqale bavalelwe okwamaviki amabili bengakavunyelwa ukuya lapho abahlala khona bekuquarrantine.}

^{Abangalamaphepha babhekane lobunzima bokuphenduka, iBotswana isihle yaqinisa ukulinda emngceleni isenzela ukwenqabela ukungena kwabantu elizweni okungekho emthethweni abangaletha iCovid 19.}

^{UMnu. Mthabisi Dube uthi sokunzima ukungena eBotswana okungekho emthethweni.}

^{“Sizwile ukuthi akumanga kuhle emngceleni, kulamasotsha indawo yonke. Lokhu kuzakwenza kube nzima ukuthi abekhaya abazama ukuphenduka, bathwale nzima.”}

^{Abavalelwe ngaphandle kwelizwe bagoqela abantwana besikolo ababevakatshele eZimbabwe. Izikolo zizaqala ukuvulwa kweleBotswana kusukela ngoLwesihlanu kusiya phambili.}

^{EleBotswana lilenani eliphansi labantu ababanjwe belomkhuhlane wecoronavirus, bengamatshumi amabili lasitshiyagalolunye (29), kuthi abangamatshumi amabili lanye (21), sebesilile. Oyedwa walahlekelwa ngumphefumulo.}

^{Kodwa leli lizwe lithi uma isimo secoronavirus singajika, uhlelo lwelockdown lulakho ukuphenduka.}

Embed share

Sokugqitshwe Uhlelo Lokuvalela Abantu Ezindlini Kwele Bostwana

by VOA

Embed share

The code has been copied to your clipboard.

The URL has been copied to your clipboard

---

No media source currently available

0:00 0:02:38 0:00

Lapho esitholakala khona

• 16 kbps | MP3
• 32 kbps | MP3
• 48 kbps | MP3

Ukudlala