Noma nje ohulumende beZimbabwe lele Russia beqhubeka beqinisa ubudlelwano kwezomnotho kanye lezombusazwe, inombolo zitshengisa ukuthi ubudlelwano phakathi kwabantu makhaza bamazwe womabili buphansi kakhulu.
Inani labantu abangena kumbe abethekelela eZimbabwe kunyanga ezine zokucina ngomnyaka ka2023 elikhitshwe luhlangothi lukahulumende olubona ngokubalwa kukazulu lokunye olweZimbabwe National Statistics Agency (ZIMSTAT), liveza ukuthi balutshwana kakhulu ababevela kwele Russia.
Abavela eRussia balihlekana phakathi kwabantu abayizigidi ezimbili zalabo abethekelele kwele Zimbabwe ngomnyaka ka2023.
Uluhlu lwenani elikhitshwe yi ZIMSTAT lutshengisa ukuthi abavela eRussia kabafikanga ikhulu, kukanti abavela eMelika kuphela baphose befike inkulungwane ezingamatshumi amathathu.
Inengi lezethekeli zavela emazweni akuzwekazi leEurope kanye leMelika
EleZimbabwe selizisondeze kakhulu kwele leRussia, ngesikhathi kulokudonselana, ikakhulu lamazwe entshonalanga ethese inkokheli yebandla leZanu PF izijeziso zenotho.
Kodwa ukuzwana kwabohulemende beRussia leZimbabwe akukatshengisi kangako ngezethekeli ezingena emazweni womabili.
Ocubungula ngobudlelwano bamazwe esekolitshini le University of Botswana, uMnunzana Tefo Pheage uthi ubudlelwano phakathi kwele Russia lele Zimbabwe buphakathi kakhulu kwabo hulumende hatshi kubantukazana.
“Ubudlwelwano phakathi kwamazwe lawa bukhangele kakhulu ukuphikisana lamazwe angahambelani lawo afana lamanye awe Europe kanye le Melika, bekhangele ukuqinisa ubudlelwano kwezomvikela kanye lezokuthula.”
UPheage uthi njalo inhlelo kanye lenhloso zikahulumende weRussia lowe Zimbabwe ziyahambelana kodwa zitshiya phandle ukuqinisa kakhulu ubudlelwano kubantukazana bamazwe womabili.
“Siyabona ukuthi amazwe la aqhuba kakhulu ukuvikela imbuso yabakhokheli, lokhu kutsho ukuthi akulantuba ye grassroots diplomacy.”
Ocubungula ezombusazwe uMnunzana Zenzo Moyo uthi ubudlelwano beRussia leZimbabwe basukela kudala, ngaphansi kwebandla leZAPU elalikhokhelwa ngumuyi uJoshua Nkomo.
“Kwathi ngokuya kwesikhathi yikho eyinye inkokheli yeZimbabwe eyaqala ukuba lobudlelwano lele Russia, okwabuya ngesikhathi seCold War."
UMoyo uthi ukwehlukana kwezamasiko kanye lolimi kufaka umgoqo ukuthi uzulu weZimbabwe kanye lowe Russia badlelane okungagoqela ukwethekelelana.
“Ulimi olukhunywa eRussia leZimbabwe kwehlukene kakhulu, njalo ubudlelwano lobu bubanzima ngoba eleRussia alifani lamanye amazwe angentshonalanga ngoba abantu bayo abavatshi kakhulu besiza kweleZimbabwe. Ngalokhu ubudlelwano ngobabantu abaphezulu.”
Isizalwane seZimbabwe uMnunzana Rodwell Moyo uthi akuvamanga ukuthi uhlangane lomuntu makhaza wakwele Russia emigwaqweni eZimbabwe.
“Ubudlelwano bethu le Russia buphezulu kubakhokheli, kodwa kithi phansi ngapha asiboni okunengi, kumbe besiphathisa kuma projects.”
UMongameli Emmerson Mnangangwa, ngoNtulikazi wethekelela kwele Moscow lapho axoxa khona lomkhokheli wakulelolizwe, uMnu. Vladimir Putin.
Ngemva kwalokho kwaba lequla elivela eRussia elalikhokhelwa nguNkosikazi Daria Falovskaya elenza imihlangano lenhlanganiso ye Zimbabwe Tourism Authority, lapho okwakhulunyiswana khona ngamathuba akhona kwezokwethekelelana.
Forum