Bathi bakhathazekile kakhulu abahlali bamalokitshi akoBulawayo esetshisa ngomkhuhlane weCovid-19 kulezinsuku agoqela iNkulumane, iEmakhandeni kanye lezinye indawo azingenyakatho kwedolobho.
Abogatsha lwezempilakahle bathi abantu abaphethwe yiCovid-19 koBulawayo okwamanje bafika phose amakhulu amabili, 183, njalo bagoqela abangamatshumi amabili lambili, 22, ababanjwe lumkhuhlane ngoLwesibili.
Phakathi kwababili ababhubhileyo, oyedwa ngowakoBulawayo.
ENkulumame, Emakhandeni lakweminye imizi efana leNorthend, lapho osokubhahe khona lumkhuhlane kakhulu kulelidolobho, ama-hot spots ngesiNgisi, izakhamizi zithi zikhathazekile.
"KumaZupco esiwagadayo yisiminye-minye, i-standing, kugcwele abanye abala ma-mask. Aku-spreywa emabhasini, kanti lasezitolo yisiminye-minye. Imemethekile iCovid-19 kundawo yethu," kutsho uMnu Dumile Ncube ohlala eNkulumane.
Amazwi kaNcube agcizelelwe nguMnu Edward Nleya, laye ohlala elokitshini linye.
"Siyamangala ukuthi i-corona ikhona kodwa mina, hayi, sengahlatshwa, but bayasinika ama-restrictions ukuthi ama-shop avalwe masinya. Hayi lokhu kuyasethusa kakhulu,” kutsho uNleya.
Umsakazo weStudio 7 usuke eNkulumane wayaEmakhandeni lapho esixoxe khona lontombazana osakhulayo uAyanda Sibanda yena othi ukumemetheka kwalumkhuhlane kulelilokitshi bekungeke kwekele ukwenzakala ngendlela abantu abaziphatha ngayo kulindawo.
Kutsho uMaSibanda: "Abantu beEmakhandeni inengi labo abagqoki ama-musk, batholakala bebuthene ezindaweni ezitshiyeneyo. Sicela ukuthi nxa kungafakwa amapholisa agcwale indawo yonke, noma amasotsha.”
Kodwa abanye bathi kabavumelani labezempilakahle kudaba lokuthi iEmakhandeni isihlaselwe kakhulu yiCovid-19.
"Bangafuni ukuthi basivalele ukuthi sisebenze, thina sifuna ukusebenza hatshi ukuthi bahlale basivalele. Abantu bayahamba-hamba, akulamumtu ole-corona, iEmakhandeni ayiso-hotspot ye-corona," kulandule uNkosazana Saziso Nkomo.
ENorthernd khona sixoxe loSimilo Ndlovu othe: “I-Covid kuthwa isiphendukile lapha eNorthend isihlasele sibili so sesisesaba. Sithi abantu abahambe bayohlatshwa sibili. Lama-mask abantu bahlale belawo because iCovid yang'khona iyingozi siyayesaba."
UMnu Mabutho Ndiweni ulebhizinisi lakhe elincane lokulungisa amafoni. Laye ukhala ezimathonsi esithi ukusabalala komkhuhlane lo lokuqiniswa kweziqondiso zokuwenqabela sokuzabulala ibhizinisi lakhe
"Inkinga yami lapha yikuthi nge-business yami engilayo yenaleyi encane, sesizafoswa ukuthi sivale. And lento ingathi izasikhosta kakhulu not mina ngedwa," kutsho uMabutho.
Sixoxe njalo losodolobho wakoBulawayo, uMayor, uSolomon Mguni, yena ukhuthaze uzulu ukuthi ayehlatshwa ijekiseni yokuvikela igciwane leCovid-19 emaklinika.
UMguni uthe: "Imizi lapha koBulawayo yiMakhandeni, leNkulumane kanye leminye imizi emalokitshini khonapha. Isiyilokhu esingathi ngesilungu ngama-hotspots. INkulumane clinic khonaphana ama-vaccine ayenziwa kanye leMakhandeni, kasikhuthazaneni siyekhona. Ukuze sivekeleke silandele izinqumo zenalezi esezibekiwe nguhulumende sitshiyane lento zemicimbi. Sitshiyane lento yamashabhini, sitshiyane lento yokugcwala ezimfeni."
Amazwi kaMguni asekelwe ngobona ngokwethulwa kwembiko kumasipala uNkosazana Nesisa Mpofu yena otshele iStudio 7 ukuthi abantu abasalandeli indlela zokuzivikela yikho nje lumkhuhlane usumemetheka.
"Umkhuhlane we Covid 19 lama responses ethu njenge community siyabona ukuthi abanye bethu sesi lulazisa, ukunanzelela kakhulu ama protocols lawa esiwatshelwayo ukuthi siwananzelele,” kutsho uMaMpofu.
“Okwakuqala siyananzelela ukuthi abantu asisagqoki ama-musk. Besesikhangela futhi i-over-crowding eyiyo futhi eyenza ukuthi iCovid-19 ibe ilokhu imemetheka. Lapho esigadela khona amabhasi kasiyenzi i-social distancing."
Lanxa uMguni ekhuthaze abantu ukuthi bayehlatshwa, inengi lithi aliwatholi amajekiseni okwenqabela lumkhuhlane ngoba ebikwa esesilela elizweni.
