Bayakhala abalezindlu emadolobheni abaphikisa okufiswa nguhulumende othi kuzafakwa umthelo wezindlu ezilesisindo esifika inkulungwane ezilikhulu zama dollar eMelika – US$100,000.
Lokhu kusanda kwethulwa ngumgciningcebo kahulumende uMnu. Mthuli Ncube ngesikhathi esethula edale lephalamende uluhlu lokusetshenziswa kwemali kahulumende – ibudget yomnyaka ka2024.
Abasekela uhulumende bathi uNcube uyitshaye ekhaleni.
UNcube uthi ufisa ukuba abalezindlu ezilesisindo lesi kusiyaphezulu behlawule umthelo oyisilinganiso sokunye ekhulwini – 1% ngomnyaka. Uthi imali ezatholakala eyeWealth Tax izasetshenziswa ukwakha amakilinika, ukulungisa imigwaqo, ukukha amanzi lokunye okufunakala emadolobheni.
Abaphikisa lokhu bathi akuqedakali ukuba izindlu lezi zizahlolwa njani ukuze kubonakale ukuthi zizathela imali enganani. UNkosazana Khethiwe Bhebhe ohlala kwele Botswana njalo olundlu koBulawayo, uthi akuqedakali okufiswa nguNcube.
Lokhu kusekelwa nguMnu. Nhlanhla Moses Ncube olomuzi eNkayi lendlu koBulawayo njalo okunhlanganiso yeFreedom Alliance. Kodwa uMnu. Joseph Tshuma, usomabhizimusi njalo okubandla leZanu PF, uthi abantu besaba umnyama ongela mpisi.
UTshuma uthi izasetshenziswa kahle imali ezatholakala phansi kohlelo lolu.
Uphinde wathi okufiswa nguNcube kusahlolisiswa lidale lephalamende.
Banengi abadabuka eZimbabwe abahlala kwamanye amazwe abalezindlu eZimbabwe. Bathi uNcube kukhanya engani ufuna ukubahlawulisa umthelo ngendlela ezingaqedakaliyo.
Forum