Uhulumende wakwele Bhilithani usefakele izijeziso zenotho isiphathamandla sikahulumende esibona ngezomvikela ewofisini kamongameli, uMnu. Owen Ncube, okhokhela amapholisa ensitha uIsaac Moyo, okhokhela amapholisa uCommissioner General Godwin Matanga lowayekhokhela iPresidential Guard uRetired Brigadier General Anselem Nhamo Sanyatwe.
Uhlangothi olubona ngokudlelana lamanye amazwe olweForeign, Commonwealth and Development Office luthi eleBhilithani lifakele izijeziso ezifanayo inkampani yebutho eyeZimbabwe Defence Industries.
Uhlangothi lolu, olwethule lokhu ebulenjini beInternet kukhasi leForeign Commonwealth and Development Office, luthi abantu laba batshotshozela udlakela ngomnyaka ka2018 langomnyaka ka2019 kuze kubulawe ababetshengisela emigwaqweni eHarare befuna kwethulwe impumela yokhetho njalo lokukhuphuka kwentengo yamafutha ezimota.
Osaphethe isikhundla sohlangothi lukahulumende olubona ngokudlelana lamanye amazwe, uDokotela Amon Murwirwa, utshele iStudio 7 ukuthi basahlolisisa okwenziwe ngele Bhilithani.
Kasenelisanga ukukhuluma labafakelwe ezijeziso zenotho lezi ngoba kade bengaphenduli omakhalekhukhwini wabo.
UMoyo loSanyatwe bafakelwa izijeziso zenotho lilizwe leMelika.