Badlana ingqondo abantu kwele Zimbabwe ngokuzanywa libandla leZanu PF elifuna uMongameli Emmerson Mnangagwa ahlale esikhundleni loba isikhathi sakhe sesedlule ngomnyaka ka2028.
Kulabanye abathi konke lokhu kusezandleni zebandla elibusayo.
Banengi abantu abakhuluma ngodaba lolu, abagoqela labo abafuna ukuba uMnangagwa aphume esikhundleni kungedlula iminyaka elawula yisisekelo sombuso welizwe.
Osesikhundleni sikamongameli okwamanje akumelanga avotelwe isikhathi sakhe singedlula loba kungaguqulwa iziqondiso zesisekelo sombuso welizwe. Kuyabahlupha abantu abanengi lokhu eZimbabwe. Omunye wabakhathazekileyo nguMnu. Mqondisi Moyo, umkhokheli webandla leMthwakazi Republic Party.
Abantu abanengi abaphikisa umbuso kaMnangagwa balombono ofanayo. Kodwa ophethe isikhundla sobona ngokwethulwa kwemibiko kubandla leZanu PF, uMnu. Farai Mharapira, uthi kabakakhulumisani ngodaba lolu loba lusekelwa ngumsekeli kamongameli uMnu. Kembo Mohadi labanye.
Ingcwethi kwezemithetho uMnu. Nqobani Sithole, okunhlanganiso yeBameli Bamalungelo Kazulu, uthi ibandla leli lilakho ukubisela uMnangagwa esikhundleni loba lisazi ukuba liyabe lisephula isisekelo sombuso welizwe.
UMnangagwa wangene esikhundleni sikamongameli ngomnyak ka2017 kulandela ukugenqula owayengumongameli uRobert Mugabe, ebambisana lebutho. Wakhethwa kabili nguzulu abaphikisayo besithi waqilibezela kukhetho olwaqutshwa ngomnyaka ka2018 langomnyaka ka2023.
Forum