Umphathintambo obona ngezemithetho uMnu Patrick Chinamasa uthi uhulumende kasoze avume ukuba lilunga lomthethwandaba weInternational Criminal Court (ICC) ngoba lelidale lisetshenziswa ngamazwe angentshonalanga ukuhlukumeza ikakhulu inkokheli yezwekazi leAfrica leLatin America.
Amazwe akumanyano weUnited Nations akhuthaze eleZimbabwe emhlanganweni ohlaziye ngamalungelo oluntu kweleSwitzerland ngenyanga edluleyo ukuba libe lilunga ledale leICC eligcweleyo njalo linanze amalungelo ezitabane.
Akhuthaze njalo uhulumende ukuthi aguqule umthetho wePublic Order and Security Act (POSA) kanye loweAccess to Information and Protection of Privacy Act (AIPPA).
Kodwa uMnu Chinamasa, yena obemela eleZimbabwe kulumhlangano ukwalile konke lokhu.
UChinamsa uthe iICC nxa ufuna ukuhlonitshwa kumele ibophe owake waba nguMongameli weMelika uGeorge Bush lowake waba yinhloko kahulumende weleBhilithani uMnu Tony Blair ngamacala okubulala uzulu ongela cala empini eyaba khona kweleIraq.
