Ikomishini ekhangelane lokuqhutshwa kokhetho elizweni ithi ayenelisi ukuqhuba amalungiselelo okhetho oluzayo ngoba ibhekane lobunzima bemali.
IZimbabwe Electoral Commission ithi ayikaqalisi ukulungisisa uluhlu lwabantu abalelelungelo lokuvota (voters' roll) lokufundisa izisebenzi zayo ngokuqhutshwa kokhetho ngenxa yokusilela kwemali.
Ingcwethi zithi lokhu kukhomba sobala ukuba ilizwe alikalulungeli ukhetho lanxa uMongameli Mugabe esithi ufuna lwenziwe lonyaka.
Umgcinisihlalo walikomishini uMnu Simpson Mutambanengwe utshele iStudio 7 ukuba bazakwenelisa ukuqalisa umsebenzi wabo nxa uhulumende sebanike imali.
Wengeze wathi kubalulekile ukuba kuguqulwe okutshiyeneyo okuphathelane lokhetho ukuze luqhutshwe ngemfanelo.
UMnu Mutambanengwe uveze njalo ukuba ngaphandle kokuguqulwa koluhlu lwe voters' roll, umthetho weReferendum Act lawo kumele uguqulwe ngoba ulokhu ukhuluma ngokuthi ukhetho luqhutshwa nguRegistrar General, khona lumsebenzi susezandleni zeZimbabwe Elecroal Commission.
Ingcwethi ecubungula ezombusazwe uMnu Bhekilizwe Ndlovu uthi imbiko yeZEC iveza obala ukuba ukhetho ngeke lwenziwe lonyaka.
