Inhlanganiso elwela ilungelo likazulu emhlabeni wonke jikelele eye Amnesty International ithi kuyayangisa okubotshwa kukaMfundisi Evan Mawarire owenhlanganiso ye #ThisFlag obotshwe ngoLwesithathu eHarare Airport.
UMnu. Muleya Mwananyanda, umsekeli womqondisi wenhlanganiso le ezansi yezwekazi leAfrica, uthi kusobala ukuthi uMawarire wetheswa icala lamanga.
"Icala leli lokuzibumbela okuthiwa ufuna ukukhipha uhulumende okungekho emthethweni ngamanyala njalo kuyayangisa.
"Lokhu okwenziwa kulandela icala elifanayo ayeletheswa nguhulumende kwenzelwa ukuthi atshaywe luvalo acine engasaqhubekeli phambili ngemkhankaso yakhe. Uhulumende ufuna ukuthi engakhulumi ngokukhahlamezwa kukazulu eZimbabwe."
Inhlanganiso le iphinde yathi kumele uhulumende akhulule uMawarire ngesiphangiphangi kungela migoqo ayifakelweyo.
Ithi uMfundisi Mawarire uyisibotshwa esilwela ilungelo lakhe okungamelanga avalelwe entilongweni.
Wabotshwa ngoNtulikazi nyakenye esetheswa icala elifanayo elalahlwa ngumthethwandaba. Wasuke kwele Zimbabwe wayahlala eMelika okwenyanga eziyisithupha.
UMawarire waziwa ngokwembatha iflegi yeZimbabwe abesekhuluma ngokuhlupha uzulu. Wakewabambisana lenhlanganiso yeTajamuka-Sesijikile Campaign ngoNtulikazi nyakenye lapho abakhanga uzulu ukuthi atshengisele ezitaladini ekhonona ngokugugudeka komnotho lokwephulwa kwamalungelo abantu nguhulumende.