Inhlanganiso ye-Amnesty International ithi kumele kukhululwe amalunga ebandla leCitizens Coalition for Change (CCC) abotshwe eHarare ngeSonto esemhlanganweni wokuthakazelela usuku lwe-International Day of the African Child.
Amalunga la afika phose amatshumi ayisitshiyangalombili, 79 azaqeda impelaviki evalelwe ngemva kokuba isinqumo sodaba lokukhululwa kwabo ngesibambiso i-bail, sidluliselwe phambili. Sesizakwethulwa ngoLwesibili.
Betheswa umlandu wokuqhuba umhlangano wezombusazwe bengela mvumo.
Abane okubikwa batshaywa kabuhlungu ngamapholisa basesibhedlela seParirenyatwa eHarare.
I-United Nations layo ike yethula imibiko iveza ukukhathazeka ngokwephulwa kwamalungelo oluntu eZimbabwe njalo ikhuthaza ukuthi kucwayisiswe imibiko yokuthunjwa, ukuhlukuluzwa kanye lokubulawa kwabaphikisayo.
Uhulumende weZimbabwe yena uthi uyawacwayisisa lawa macala.
Ukuhlaziya loludaba sixoxe loMnu. Effie Dlela Ncube, ingcwethi yezombusazwe njalo ekhokhela inhlanganiso elwela amalungelo abathengi eyeNational Consumer Rights Association.
Forum